එදා මෙදා තුර කදුලට විවරවු
දෑස් පියන්පත් කවුළු වසා
ලයේ තලාගිය ස්නේහයේ සුව
සිනා පිරුණු රත් දෙතොල් වසා...
මිලාන වී ගිය - රෝස කුසුම් පෙති
කම්මුල් සුදුමැලි පාට පොවා
දෑත ලයේ බැද අවසන් ගමනක
සොදුරිය මට නොකියාම ගියා...
දෑස් කවුළු පත් පලා කදුලු කැට
වෑහෙද්දී මගෙ දෑස් අගින්
කාත් කවුරුවත් වෙතත් සිතයි මට
පාත් වෙන්න ඔය මුවට උඩින්
ඈත්ව යන්නට - සමුගෙන කදුලක්
ඔබෙ මුව දොවතත් සුවඳ පැනින්
මාත් මගේ හිතටත් ඔබ සුවඳයි
ඈත් නොවේමයි ඒ සුවදින්...
එදා මෙදා තුර...//
ඊයේ ඉපදී අද මිය යන්නට
පෙරුම් පුරාගෙන උපන් ලයේ
හීයේ වේගෙන් අහස උසට බැඳි
ආදර ලෝකය හෙටත් තියේ...
ඒත් ඉතින් ඒ - සොදුරියෙ ඔබ නැත
ඇයිමේ ලොව මා තනිව ගියේ
ආයේ දවසක එක හිත් ඇත්නම්
මේ අපි ඉපදෙමු එකට ප්‍රියේ...
එදා මෙදා තුර...//
සුභ දවසක් වේවා කියල වෙනදා වගේම පැල්පතට ගොඩ වදින්න සිතුවත් මොකක්දෝ අමුත්තක් හිතට දැනෙනවා හරියට ලොකු වරදක් කරලා සැඟවුනු කෙනෙක්, එලියට එනව වගේ...නැහැ කවදාවත් නැ..."පැල්පත" අමතක කරන්න මගේ කිසිම බලාපොරොත්තුවක් නැ...!
දුකක්, විරහවක්, හිත කීරී ගැහෙන හැඟීමක් එක්ක කියවෙන සනත් නන්දසිරි මහත්ම‍යගේ මේ ගීතයට ඇත්තටම මා නම් අකමැතියි...ඒ ඇත්ත තිත්තයි කියන වදන නිසාම විය යුතුයි. සැබවින්ම ගීතය කෙතරම් සිතට දැනෙනවාද කිවතොත්, ගීතය දිනකට එක්වරක් හෝ ඇසුනොත් මුළු දිනය පුරාම අක‍මැත්තෙන් වුවත් ගීතය මුවේ මිමිණේ. ඒ බව ගීතය රස විදි ඔබටත් හැඟී ඇතැයි මා විශ්වාස කරමි. ගීතයේ අරුත පිළිබඳ මා පැහැදිලි නොකලත් ගීතයට සවන් දෙන ඕනෑම කෙනෙකුට අමුතු දුක්බර හැඟීමක් දැනෙන මේ ගීතය මා ඇසූ විදි වෙනත් ගීත වලට වඩා හාත්පසින්ම වෙනස් වූවක්.
සිතට දැනෙන ප්‍රේමය හෝ සිතේ ඇතිවන අවංක ආදරය අප වෙත ලබාගැනීමට අප නොයෙකුත් උපක්‍රම යොදයි. එසේ ලබාගත් ආදරය, රදවා තුරුල් කරගන්නට අප තවත් උපක්‍රම යොදයි. තවත් මොහොතක එවන් ආදරයක් විරහවක් වූ විට, නැතිනම් ඇය හෝ ඔහු වෙන්ව ගිය විට ගෙන්වා ගැනීමට තවත් සමහර ක්‍රම යොදයි....එසේ වන්නේ මේ සෑම මොහොතකම ඇය හෝ ඔහු කෙරෙහි කුමන ආකාරයෙන් හෝ බලාපොරොත්තුවක් තම සිතතුල ඇති වන නිසාම වියයුතුයි. නමුත්, උපරිම ප්‍රේමයෙන්, ආදරයෙන් වෙලී සිටි දෙදෙනෙකුගෙන් අයෙක් දිවියෙන් සමුගතහොත්....,
නැත උපක්‍රම, පිළියම් කිසිවක් නැත...!
විමල් ජයශාන්තයන්ගේ පද රචනයට විශාරද සනත් නන්දසිරියන්ගේ හඬින් රසවත් වුනු මේ ගීතය පැල්පතට එක් කිරීමට මා හට ප්‍රධාන හේතුව වූයේ මා සමඟින් එකට අධ්‍යාපනය හැදෑරූ මගේම මිතුරෙකුට මුහුණ දීමට සිදුවූ මෙවන්ම සිදුවීමක් නිසායි. හෙට දින හෝ මතු උපදින ආත්මයක මෙවන් සිද්ධීන් ඇසීමටවත් ඉඩ නොලැබේවායි මගේ ප්‍රාර්ථනය...
ඒ වගේම ගීතය පැල්පතට එකතු කිරීමටත්, ගීත රචකයා පිළිබඳ සොයා ගැනීමටත් බෙහෙවින් උපකාර කල නිශා සොයුරියටත්, නිතර ගීතය මුවේ මුමුණන මගේම සහෝදර සුරංගටත් බෙහෙවින් ස්තූතිවන්ත විය යුතුයි...
(ගීතයේ සංගීත අධ්‍යකෂනය කල ශිල්පියා පිළිබඳ තොරතුරු දන්නේ නම් එකතු කරන ලෙස පැල්පතට ගොඩ වදින ඔබෙන් ආදරයෙන් ඉල්ලා සිටිනවා)
11 මේ ගැන කියපු කථා:
මම ආසම සින්දුවක්......මේව බ්ලොග් එකක හරි දකින එකට ගොඩක් සතුටුයි..........
ගොඩක් ලස්සනට ඒක ලියලා.ඈත්තටම ලස්සන ගීත පෑල්පතට එකතු වෙන 1 ගෑන ගොඩක් සතුටුයි.........
මේ සින්දුව ගැන නම් ඉතින් පුබුදුවාට කියන්න වචන නැහැ.මුලු ඇගම හිරිවැටිලා යන සින්දුවක්.සිතට බොහොම තදින් දැනෙනවා.තේරුමට අකමැති වුනත් සින්දුව නිතරම මිමිනෙනවා.
පැල්පතේ මකුලු දැල් ටික එහෙම කඩලා දාපු අලුත් පෝස්ට් එක මසුරන් වටිනවා...
හරිම ලස්සන සින්දුව ඔන්න මම බා ගත්තා . ගොඩක් ඉස්තූතියි
ජ්විතේට මෙවන් ගීයක් කිසිවෙකුගේ අත්දකිමක් නොවේවා....
YOU MADE ME CRY DEAR....
ආදරයෙන් මෙවන් වේදනාවක් නොලබපු කෙනෙකුට වුනත් මේ ගීතය අහලා පැලෙන්න අඬන්න පුලුවන් . ..
අපූරු සටහන . .
හරිම ලස්සන සින්දුවක්...මේක ඔය රචකයගේ ජීවන අත්දැකීමක් කියල සනත් නන්දසිරිම කියල තියනව,සංගීතයත් එතුමගෙම වෙන්න ඕන.
ඒ වගේම ඔය ගීතය එම රචකයගෙ පලමු හා අවසාන ගීතය,අවාසනාවකට ඒ මහතා දැන් අපි අතර නෑ කියලයි නන්දසිරි මහත්තයා කියන්නෙ.
1975 ඉදල අවුරුදු 40කටත් ලං වෙන්න ඇවිල්ල තාමත් රසය එහෙම්මමයි.
මේ සිංදුව අහද්දී මට පොඩි අත්දැකීමක් මතක් වුනා. දවසක් මං අදුරන යාලුවෙක් ගේ මළ ගෙදරක ගියා. නැති වෙලා හිටියේ යාලුවාගේ අම්මා. එයාලගේ අප්පච්චි ඔය සිංදුව ලියපු බැනර් එකක් මිනිය තියලා තිබ්බ හරියේ බිත්තියේ ගහලා තිබ්බා.
එන එන හැමෝම ඔය පද පේලී ටික කියවලා ගොඩාක් දුක් වුනා. ඇත්තටම එයාලගේ අප්පච්චියේ හිතේ තිබ්බ ඔක්කෝම දුක ඒ ගීයේ කැටි වෙලා තියෙනවා කියලයි මට හිතුනේ. ඇත්තටම ලස්සන ගීයක් !!!!
පලමු වතාවට පැල් පතට ගොඩ වැදුනේ ලස්සන ගීයක මිහිර විදගෙනමයි.
ආදරය විරහව පමණක් දැනෙන ගීත ඇතුලෙ මෙවන් දුක් ගී තවත් කොපමණ ඇතිද කියල මට තවමත් හිතෙනවා...ඉතින් ගීය රසවිද ඒ පිළිබඳ අදහස් දක්වා යෑමට අමතක නොකරපු සහෝදර බ්ලොග් කරුවන් සියළු දෙනාට හදවතින්ම ස්තූතිවන්ත වන අතරම, යන එන ගමන් නැවතත් පැල්පතට ගොඩවැදිල යන්න කියල නිහතමානී ආරාධනාවක් කරනවා...
agey agey....
Post a Comment
අමතක කරන්න එපා ඔබේ අදහස පැල්පතට ගොඩක් වටිනවා...!