෴ පැල්පත෴

"අමිල රසිකත්වයක් රැදි, හදේ ගිමන්හල.."

...පෙ‍ම්වති‍‍යට...

"එදා මෙදා තුර..."


එදා මෙදා තුර කදුලට විවරවු
දෑස් පියන්පත් කවුළු වසා
ලයේ තලාගිය ‍ස්නේහයේ සුව
සිනා පිරුණු රත් දෙතොල් වසා...
මිලාන වී ගිය - රෝස කුසුම් පෙති
කම්මුල් සුදුමැලි පාට පොවා
දෑත ලයේ බැද අවසන් ගමනක
සොදුරිය මට‍ නොකියාම ගියා...

දෑස් කවුළු පත් පලා කදුලු කැට
වෑහෙද්දී මගෙ දෑස් අගින්
කාත් කවුරුවත් වෙතත් සිතයි මට
පාත් වෙන්න ඔය මුවට උඩින්
ඈත්ව යන්නට - සමුගෙන කදුලක්
ඔබෙ මුව දොවතත් සුවඳ පැනින්
මාත් මගේ හිතටත් ඔබ සුවඳයි
ඈත් නොවේමයි ඒ සුවදින්...

එදා මෙදා තුර...//

ඊයේ ඉපදී අද මිය යන්නට
පෙරුම් පුරාගෙන උපන් ලයේ
හීයේ වේගෙන් අහස උසට බැඳි
ආදර ලෝකය හෙටත් තියේ...
ඒත් ඉතින් ඒ - සොදුරියෙ ඔබ නැත
ඇයිමේ ‍ලොව මා තනිව ගියේ
ආයේ දවසක එක හිත් ඇත්නම්
මේ අපි ඉපදෙමු එකට ප්‍රියේ...

එදා මෙදා තුර...//


සුභ දවසක් වේවා කියල වෙනදා වගේම පැල්පතට ගොඩ වදින්න සිතුවත් මොකක්දෝ අමුත්තක් හිතට දැනෙනවා හරියට ලොකු වරදක් කරලා සැඟවුනු කෙනෙක්, එලියට එනව වගේ...නැහැ කවදාවත් නැ..."පැල්පත" අමතක කරන්න මගේ කිසිම බලාපොරොත්තුවක් නැ...!
දුකක්, විරහවක්, හිත කීරී ගැහෙන හැඟීමක් එක්ක කියවෙන සනත් නන්දසිරි මහත්ම‍යගේ මේ ගීතයට ඇත්තටම මා නම් අකමැතියි...ඒ ඇත්ත තිත්තයි කියන වදන නිසාම විය යුතුයි. සැබවින්ම ගීතය කෙතරම් සිතට දැනෙනවාද කිවතොත්, ගීතය දිනකට එක්වරක් හෝ ඇසුනොත් මුළු දිනය පුරාම අක‍මැත්තෙන් වුවත් ගීතය මුවේ මිමිණේ. ඒ බව ගීතය රස විදි ඔබටත් හැඟී ඇතැයි මා විශ්වාස කරමි. ගීතයේ අරුත පිළිබඳ මා පැහැදිලි නොකලත් ගීතයට සවන් දෙන ඕනෑම කෙනෙකුට අමුතු දුක්බර හැඟීමක් දැනෙන මේ ගීතය මා ඇසූ විදි වෙනත් ගීත වලට වඩා හාත්පසින්ම වෙනස් වූවක්.
සිතට දැනෙන ප්‍රේමය හෝ සිතේ ඇතිවන අවංක ආදරය අප වෙත ලබාගැනීමට අප නොයෙකුත් උපක්‍රම යොදයි. එසේ ලබාගත් ආදරය, රදවා තුරුල් කරගන්නට අප තවත් උපක්‍රම යොදයි. තවත් මොහොතක එවන් ආදරයක් විරහවක් වූ විට, නැතිනම් ඇය හෝ ඔහු වෙන්ව ගිය විට ගෙන්වා ගැනීමට තවත් සමහර ක්‍රම යොදයි....එසේ වන්නේ මේ සෑම මොහොතකම ඇය හෝ ඔහු කෙරෙහි කුමන ආකාරයෙන් හෝ බලාපොරොත්තුවක් තම සිතතුල ඇති වන නිසාම වියයුතුයි. නමුත්, උපරිම ප්‍රේමයෙන්, ආදරයෙන් වෙලී සිටි ‍දෙදෙනෙකුගෙන් අයෙක් දිවියෙන් සමුගතහොත්....,
නැත උපක්‍රම, පිළියම් කිසිවක් නැත...!
විමල් ජයශාන්තයන්ගේ පද රචනයට විශාරද සනත් නන්දසිරියන්ගේ හඬින් රසවත් වුනු මේ ගීතය පැල්පතට එක් කිරීමට මා හට ප්‍රධාන හේතුව වූයේ මා සමඟින් එකට අධ්‍යාපනය හැදෑරූ මගේම මිතුරෙකුට මුහුණ දීමට සිදුවූ මෙවන්ම සිදුවීමක් නිසායි. හෙට දින ‍හෝ මතු උපදින ආත්මයක මෙවන් සිද්ධීන් ඇසීමටවත් ඉඩ ‍‍නොලැබේවායි මගේ ප්‍රාර්ථනය...
ඒ වගේම ගීතය පැල්පතට එකතු කිරීමටත්, ගීත රචකයා පිළිබඳ සොයා ගැනීමටත් බෙහෙවින් උපකාර කල නිශා සොයුරියටත්, නිතර ගීතය මුවේ මුමුණන මගේම සහෝදර සුරංගටත් බෙහෙවින් ස්තූතිවන්ත විය යුතුයි...
(ගීතයේ සංගීත අධ්‍යකෂනය කල ශිල්පියා පිළිබඳ තොරතුරු දන්නේ නම් එකතු කරන ලෙස පැල්පතට ගොඩ වදින ඔබෙන් ආදරයෙන් ඉල්ලා සිටිනවා)




::::ගීතය මෙතනින් බාගන්න::::

"ඔබ හීනයක් වගේ"


ඔබ හීනයක් වගේ
හාදු වැස්සක් අරන්
සිරියහන අද්දරට වී
වැතිරෙන්නෙපා සයනේ
මම සස්වාමිකයි ස්වාමි...//

මල් මකරන්ද දෝතට අරන්
නෙතේ කදුලැලි දරන්
මම මඟ බලා සිටියා...
නෙතු ඝණදුරට තරුවක් වෙලා
ඔබ ‍එතැයි සිතා...
සිල් බිදලන්න නොහැකි නිසා
මම මග බලා සිටියා...

ඔබ හීනයක් වගේ...//

මේඝ දුක් හද රැදුනා
සඳ එළිය නිවුනා
අඳුර මැද තනිවී
පහන් දොරකට සවන් දොර හැරුනා
තරු ඇසත් පිපුණා...
සඳ ලබන්නී මා...
සරා සඳ ලඟ මා...

නිතරම වගේ ඇති වන මගේ පමා වීමට, සමාවක් ඉල්ලමින් ඔන්න ටික දිනකට පස්සේ පැල්පතට ගොඩ වැදුනා...අළුත් ලිපිය පටන් ගැනීමට පෙරම අහන් ඉන්න ගීතයට ලැබුනු ප්‍රතිචාර වලට හා තොරතුරු වලට ස්තූති වන්ත වන බව මුලින්ම කියන්න ඕනෙ. අළුත් දෙයක් පැල්පතට එකතු කිරීමට පමා වීමට එක් පුංචි හේතුවක් වුනේ මේ ගීතය. ඒ මෙම ගීතය නොඇසූ අයට අවස්ථාවක් දීමට යැයි කිව්වොත් නිවැරදියි.
එසේ නම් උපුල් ශාන්ත සන්නස්ගලයන්ගේ පද රචනයට රෝහණ වීරසිංහයන්ගේ මියුරු සංගීතයෙන් රසවත් වුන, පුරා වසර කිහිපයක සිටම තවමත් අප හදවත් තුල රැව් පිලි රැව් දෙන තවත් එක් අලංකාර ගීතයක් මෙසේ පැල්පතට එක් කරන්න මා සිතුවා..."ඔබ හීනයක් වගේ" විශාරද දීපිකා ප්‍රියදර්ශනි විසින් රසවත් ලෙස ගායනා කරන මෙම ගීතය සෙනේශ් දිසානායකයන්ගේ ආදරනීය වස්සානය චිත්‍රපටයේ ගීතයක් වෙනවා. පෙර ගීත මෙන්ම මෙය නොඇසූ රස නොවිදිය කෙනෙක් නොමැති තරම්. නමුත් තවමත් ඔබේ ගීත එකතුවට මෙම ගීතය එකතු කර ගැනීමට නොහැකි වූවානම් පැල්පතෙන් ඒ සඳහා අවස්ථාව ලබාගන්නා ලෙස ඉල්ලා සිටිනවා...



::::‍ගීතය මෙතනින් බාගන්න::::

"අහන් ඉන්න - අහගෙන ඉන්න"


අහන් ඉන්න - අහගෙන ඉන්න
මගෙ හිත..මොනවද..මුමුණනවා....//

යාය පුරා නෙ‍ක නෙක පාටින්
මුදු මල් පෙති ඇහැරෙනවා...
පොද වැස්සක සීතල ඇවිදින්
සිතට එබෙනවා...
කෝඩුකාර මල් රේණු අගින්
සුවද බෙදනවා...
ඒ සුවදින් මගේ හුස්ම රටා මවනවා...

අහන් ඉන්න - අහගෙන ඉන්න
මගෙ හිත..මොනවද..මුමුණනවා....//



සිලි සිලියේ හමන සුලග
කොදුරන්නෙ අපටමයි...
සතුට මිසක දුක මොකටද
සෙනෙහස මහමෙරයි...
අමාවකේ දුක දුරලන
දහසක් තරුකැට නුඹටයි...
ඒ එලියෙන් දැල්වෙන ලෝකය
මගෙමයි මටමයි...

අහන් ඉන්න - අහගෙන ඉන්න
මගෙ හිත..මොනවද..මුමුණනවා....//


සුභ දවසක් අදත් පැල්පතට එක වුන හැමොටම. ඉතින් ඔන්න අද අරගෙන ආපු ‍ගීතය නම් එතරම්ම ජනප්‍රිය වුන ගීතයක් නොවෙයි. ‍නමුත් ගීතය මෙතෙක් මා දන්නා තරමින් ඇසූ සියළු දෙනා පැවසුවේ ගීතයේ ඇති රසය සහ එහි අරුත කියා නිමකල නොහැකි බවයි. නමුත් අවාසනාවකට වගේ මේ ගීතයේ ගායනය, තනු නිර්මාණය හා සංගීතය නිර්මාණය කලේ කවුද යන්න මෙතෙක් සොයාගන්නට නම් නොහැකි වුනා. නමුත් මේ ගීතය ගැන තොරතුරු මා දන්නා කිහිප දෙනෙකුගෙන් සපයා ගන්නට හැකිවුනා. ඉතින් ගීතයේ අර්ථය පැහැදිලි කරනවාට වඩා එය නිර්මාණය කරන ලද්දේ කුමක් සදහාද යන්න සොයා බැලීම ඊට වඩා වැදගත් බව පැහැදිලි වුනා.
එසේනම් මුලින්ම කියන්නම් ගීතය මගේ සවනතට වැටුනු ආකාරය. ඉතින් ගීතය මා හට ලබා දුන් පුද්ගලයා ගැන පැල්පතට අමුතුවෙන් හදුන්වාදිය යුතුව නැතැයි මම විශ්වාස කරනවා එනම් ඔහු තමයි පැල්පතේ මගේ ස‍හෝදර අමිLaයා. ඔහු විසින් දැනට මාස කිහිපයකට පෙර ලබාදුන් මේ ගීතය තවමත් මා රසවිදින්නේ ඉතාම කැමැත්තෙන්. ගීතය ලබාදීමේදී ඔහු විසින් ලබාදුන් තොරතුරු කිහිපයක් මම ඉදිරිපත් කරන්නම්. එනම් මෙම ගීතය නිර්මාණය කර ඇත්තේ සංගීත ක්‍රම දෙකකිනුයි. එක් ක්‍රමයක් එනම් මෙහි ladys Version එක ඉදිරිපත් කර ඇත්තේ clasical ක්‍රමයටයි. නමුත් මෙහි අනෙක් ගීතය Rock Music Style එකෙන් ඉදිරිපත් කරල තියෙනවා. ගීතය ගැන තවත් වැදගත්ම තොරතුරු ඔහු විසින්ම අපට හදුන්වා දුන්නා. එනම් මෙම ගීතය ගායනා කරන ගායිකාව අන්ධ බව පැවසෙනවා. ඒ බව ගීතය තුල ප්‍රේකෂකයාට ඒත්තු ගැන්වීමට ගීතය ගායනා කරන අතර එහි අන්තරා කොටස අවසා‍නයේ "මෙතෙක් ගීතය ඇසුවේ ඔබේ විදියටයි, දැන් මගේ විදියට ගීතය රසවිදින්න" යනුවෙන් ගායිකාව ආරාධනා කරනවා. මෙම අවස්ථාවේ මෙතෙක් අප ගීතය රසවිදි ආකරය සපුරාම වෙනස්ව අනුකම්පාව මුසු අමුතුම හැගීමක් සිතට ඇතිවෙනවා. ‍ඒ බව ඉතාම හොදින් රසවිදි තවත් විශේෂ පුද්ගලයෙක්ගෙන් මා හට තොරතුරු ලැබුනා ඔහු නම් බ්ලොග් කලාවේ අප කවුරුත් හදුනන "ආගන්තුකයා" විසිනුයි, ඔහු මෙම ගීතය මුලින්ම රසවිද ඇත්තේ එක් අවස්ථාවක ඔහු සහභාගී වූ සජීවී වැඩසටහනක් තුල එහි විවේක කාලයේදී ඉදිරිපත් කල ගීතයක් ව‍ශයෙනුයි. එහිදීත් මා පෙර පැවසූ ආකාරයට ගීතයේ අන්තරා කොටසේ දී වේදිකාව ඇතුලුව මුළු ශාලාවේම විදුලි පහන් නිවා ගායිකාව විසින් ඇගේ ආකාරයට ගීතය රසවිදින්න ආරාධනා කල බවක් පැවසුවා. එම අවස්ථාවේ ප්‍රේක්ෂකයන් සියල්ලන්ටම ඇය අන්ධ ගායිකාවක් බව හැගවීමට එම ඉදිරිපත් කිරීම සිදුකර ඇති බව පැවසුනා.
එමෙන්ම ගීතයේ Rock Version එක ගැන කතා කරනවා නම් ගීතය ගායකයින් දෙදෙනෙකු විසින් ගායනා කරනු ලබනවා. එයින් එක් ගායකයෙකු නම් මා බෙහෙවින් ප්‍රිය කරන රොක් ගාය‍‍කයෙකු වන chapz ‍නොහොත් ඉන්ද්‍රචාප ලියනගේයි. නමුත් අනෙක් ගායකයා හෝ සංගීතය නිර්මාණය කලේ කවුද යන්න නිවැරදිව මා හට සොයාගැනීමට නොහැකි වුනා. ඉතින් වෙනත් ගීත මෙන් එහි අන්තර්ගත‍ව ඇති අරුත විචාරය කරනවාට වඩා මෙම ගීතයේ නිර්මාණය සදහා දායක වූ විශිෂ්ඨයන්‍ සොයා ගැනීම වැදගත් බව මට හැගීගියා. ඉතින් ඒ සදහා ගීතය ගැන යම් තොරතු‍රක් ඇතොත් ඉදිරිපත් කරන ලෙසට පැල්පතට එන ඔබෙන් මා ඉල්ලා සිටිනවා . ඒ ‍වගේම ඉහත සදහන් කල තොරතුරු නිල තොරතුරු නොවන අතර එයින් ගායකයින්ට හෝ ගීතයට යම් හානියක් වේ නම් පැල්පත වෙනුවෙන් මා සමාව අයද සිටිනවා...


නැවත සැකසීමයි:
හොදයි හා පැටික්කී, හා මල්$han ඇතුළු මගේ පැල්පතට ගොඩවැදුණු සහෝදරයින් කිහිපදෙනාගේ අදහස් නිසා ලිපිය නිවැරදි ආකාරයට වෙනස් කරන්නට සිදු වුනා. ඔබ සියළුදෙනා විසින් ලබා දුන් මේ අදහස මට මෙන්ම ගීතය පිළිබඳ උනන්දුවක් තිබූ සැමට බෙහෙවින් වැදගත්වෙයි කියල මම හිතනවා.
Female version
ගායනය : මේකලා ගමගේ
සංගීතය : රුවන් ශ්‍රී වල්පොල
පද රචනය :‍ සෝමලතා හේරත් මැණිකේ
Male version
ගායනය : ඉන්ද්‍රචාප ලියනගේ සහ ...............
ඇල්බමය : "අභිනිෂ්ක්‍රමණය"

තවත් බෙහෙවින් වැදගත්වේ යැයි සිතෙන නිල නොවන අදහසක් මෙමගින් ඉදිරිපත් කිරීමට කැමතියි. මෙම ගීතයේ Rock version ගීතය ගායනා කරන අනෙත් ගායකයා අබාධිත පුද්ගලයෙකු බවත්, මෙම ගීතය ඉදිරිපත් කර ඇත්තේ අබාධිත පුද්ගලයින් වෙනුවෙන් වූ යම් වැඩසටහනකට බවත් පැවසෙනවා. ඉදිරියේදී නිවැරදි තොරතුරක් ඇතොත් ඉදිරිපත් කිරීමට පැල්පතෙන් මා බලාපොරොත්තු වෙනවා.


::::Classical Version එක මෙතනින් බාගන්න::::
::::Rock Version එක මෙතනින් බාගන්න::::

"සිංහල ෆොන්ට් පැල්පතෙන්"


සුභ දවසක් කියල ප්‍රාර්ථනා කරනවා සුපුරුදු විදියට, ඉතින් අද අරගෙන ආපු ලිපිය නම් ‍මින් පෙර පැල්පතෙන් ඉදිරිපත් කල ලිපියක්මයි. ඉතින් බොහෝ දෙනාගේ ඉල්ලීම පරිදි ලිපිය නැවත සංස්කරණය කර ඉදිරිපත් කරන්නට සිතුවේ මෙම ලිපියේ ව‍ටිනාකම පිළිබද පෞද්ගලිකව මා හට ලිපි එවූ අය නිසාමයි. ඉතින් ලිපිය ගැන පැවසීමට ගොඩක් කාරණා නැ. පරිගණකය අශ්‍රිත වැඩකරන අපට නැතිවම බැරි දෙයක් වන්නේ මේ සිංහල අකෂරයි. ඉතින් සිංහල අකෂර එකවර බාගත කර හැකි වෙබ් අඩවියක් මෙතෙක් මා නම් දන්නේ නැති තරම්. ඉතින් මේ නිසාම සිංහල අකෂර 100කට අදික ප්‍රමාණයක් පැල්පතට ඉදිරිපත් කිරීමට මා සිතා ගත්තේ. ඉතින් මෙහි ප්‍රයෝජනවත් බව මෙය අශ්‍රිත ඉන්න ඔබට අමුතුවෙන් පැහැදිලි කල යුතුව නැතැයි මා විශ්වාස කරනවා. බාගත කරගත් මෙම අකෂර නිවැරදිව පරිගණකය තුල ස්ථාපනය කිරීම සදහා ක්‍රමය මා නොදන්නා අය උදෙසා දල ව්‍ශයෙන් පැහැදිලි කරන්නම් එනම් මුලින්ම start - Control Panel යන්න‍ තොරාගන්න ඉන්පසු එහි ඇති Font යන අයිකනය තොරා ඔබ බාගත කරගත් ෆොන්ට් සියල්ල Copy කර ඉහත කී Font අයිකනය තුලට Paste කරගන්න.
ඉතින් ලිපිය බාගත කර ගැනීමට ආරාධනා කරන ගමන් අදහසක් එකතුකර යන්න කියලත් මතක් කර සිටිනවා...


::::මෙතනින් බාගන්න::::

"සිහින හතක්"


සිහින සතක් දුටුවෙමි මම
සත් දවසක් එක විලසට
එක සිහිනෙක ඔබ දුටුවා
සිඟන්නියක සේ...//

ඔබ මගෙ පැල්පතට පැමිණ
අයාචනයක් කරමින්...//
ජීවත් වන්නට කිසිවක්
ඉල්ලා සිටියා...

කිසිවක් දෙන්නට මට නැත
තිබුනේ පිරිසිදු හදවත...//
සිඟන්නියේ එය ඔබහට
දුන්නා මතකයි...

එදා ම‍ගේ හද අරගත්
ඔබ අද වැඩි පොහොසත්...//
ඒ හින්දා මටත් එලෙස
පිහිට වනු මැනේ...//

සුභ දවසක් වේවා කියල ප්‍රාර්ථනා කරනවා පැල්පතට ගොඩවැදිල ඉන්න හැමෝටම. ඉතින් සමාවෙන්න ‍ඕනෙ දින කීපයකින්ම මේ පැත්තට ඒමට නොහැකි වූවාට. ඉතින් දින කිහිපයකට පස්සේ අද අරගෙන ආපු ගීතය ගැන කියන්න කලින්, ගීතය මට ඇහුනු විදිය ගැන පොඩි කතාවක් කියන්න ඕනෙ. කථාව ඇර‍ඹෙ‍න්නෙ මෙවර පොසොන් නිවාඩුවේදී මා සහභාගී වුනු අම්පාර වන්දනා චාරිකාවේදීයි. ඉතින් සුපුරුදු විදියට අප සහභාගී වූ මේ ගමනේ විනෝදය වැඩිකරගන්න හිතාගෙන මමත් ඇතුලු අපේ නඩයේ සිටි තවත් තරුණ අය කිහිප දෙනෙක් සමගින් ගීත ගායනා කරමින් සිටියා. ඉතින් බහුතරයක් නව පරපුරේ ගීත වුවත් පැරණි ගීතත් දන්නා තරමින්‍ හෝ ගායනා කලේ වැඩිහිටි කිහිප දෙනෙකුත් ගායනයට හවුල් වේවි කියා සිතුනු නිසාමයි. ඉතින් මේ අතරේ අප ගායනා කල ගීත වල යම් මන්දගාමී අවස්ථාවක් පැමිණි වෙලාවක ගීතය ගායනයට මෙතෙක් අවතීර්ණ නොවුනු මගේ පියාත් ගීතයක් ගායනා කිරීමට සූදානම් වූ බවක් පෙනුනා. බො‍හෝම කලාතුරකින් එන මෙවැනි අවස්ථාවක, අනෙත් අයගේත් අවධානය ඔහුවෙත යොමුකරමින් මා අප්පච්චීගේ ගීතයට සහාය පලකලා. වෙනදා ගායනා කරන, අප්පච්චී ප්‍රිය කරන ගීත කිහිපයක් ඇතිනිසා එවන් ගීතයක් බලාපොරොත්තු වුවත්, මා විසින් නොඇසූ අලුත් ගීතයක් කොහෙත්ම බලාපොරොත්තු වූයේ නැ. කෙසේ වුවත් එම අවස්ථාවේ මෙම ගීතය කෙතරම් උචිත වූවාද කිවතොත්, තරුණ පරපුරේ අපි කිහිප දෙනෙක් හැරෙන්නට වාහනය තුල සිටි සියලු දෙනාම ගීතය මුමුණනු මට පෙනුනා. ඉතින් ඒ විදියට සවනට වැටුනු ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍මෙතරම් රමණීය ගීතයක් මෙතෙක් ඇසීමට නොහැකී වීම පිළිබඳ එම අවස්ථාවේ මා තුල මහත් කණගාටුවක් ඇති වුනා.
ඉතින් මේ සිදුවීමෙන් පසුව තමයි ගීතය පැල්පතට ගෙන ආ යුතුයි කියා මා සිතුවේ. ඉන්පසු ගීතය කිහිපවරක් රස විද තමයි අද ගීතය මෙලෙසින් ඉදිරිපත් කරන්නෙ. ගීතය ගායනා කරනු ලබන්නේ වික්‍ටර් රත්නායක ශූරීන් විසිනුයි. ගීතයේ අරුත පිළිබද පැවසීමේදී ගීත රචකයාගේ අදහස වී ඇත්තේ ආදරයක් බලාපොරොත්තුවෙන් සිටින, ඒ පිළිබද සිහින දකින කෙනෙකුට ඔහුගෙන් සරණක් බලාපොරොත්තුවෙන් පැමීණෙන පෙම්වතියක් ගැන වග මුල් පද කිහිපය තුලම ‍පැහැදිලි වෙනවා. ඒ අවස්ථාව මානා ලෙස ගැලපීමට ඔහු අසලට අයාචනයක් කරමින් පැමිණෙන යාචකාවියක් පිළිබද ගීතය තුලින් ඉදිරිපත් කරනවා. එසේ අයාචනා කරමින් පැමිණෙන යාචකාවියට සරණ වීමට වෙන කිසිවක් නැති මොහොතක ඔහු තුල තිබූ නොයිදුල් පිරිසිදු හදවත එනම් ඔහුගේ ආදරය පිරිනැමූ බව ගීතයේ අන්තරා කොටසින් ඉදිරිපත් කරනවා. නමුත් ගීතයේ අවසානයට පිවිසෙත්ම අද වර්තමානය වන විට එදා හදවත අරගත් යාචකාවිය අද ඔහුටත් වඩා පොහොසත් වී ඇති බවත්, මේ මොහොතේ එදා ඇයට පිහිට වූවාක් මෙන් ඔහුට ද පිහිට වන ලෙස ඇයට ආරාධනා කරයි.
ඉතින් වෙනදාට වඩා ලිපිය ටිකක් දිග වුනාට සමාවෙන්න ඕනෙ. ඉතින් සුපුරුදු පරිදි ගීතය රසවිද, වෙනත් අදහස් ඇතිනම් ඉදිරිපත් කරන ලෙසත් සියලු‍ දෙනාගෙන්ම ආදරෙන් ඉල්ලාසිටිනවා...


::::ගීතය මෙතනින් බාගන්න::::

"මතකේ හස‍රැල්"


කියන්නට බැරි තරම් ‍- ඔබට ආදරෙයි මං
දරන්නට බැරි තරම් - ‍දුක වාවන්නට බැ දැන්
ඔබ ඇයි කුරිරු මේ තරම් - සිතක් නැති කෙනෙක් මෙන්
මා හෙලනා මේ සුසුම් - ඔබට දැනෙනවා නම්
මා සොයා යලි ඇවිත් - සිප ගන්නකෝ මා දෙතොල්...

මතකේ හස‍රැල් නැගෙන රැයේ
දෙනෙතින් කදුලැල් ගලා ගියේ
ජීවිතයේ රස දැනෙන දිනේ
ඔබ මා හැරදා ඇයිද ගියේ...

ඔබ ඇයි අන්සතු වුනේ - ඔබ ඇයි මා හැරගියේ
පූජනියයි ආදරේ - ඔබ එය නොදනී ප්‍රියේ
දිවි ඇතිතෙක් මේ බවේ - ඔබට පමණයි ආදරේ
මා හද පතුලේ ඔබේ - රුව සදා ඇදී තිබේ...

සිතකින් නොව ඔබ දමා ගියේ
ඔබ ගැන සිහිවෙයි හැම මොහො‍‍තේ
දුක පමණයි මට උරුම වුනේ
සමාවෙන්න කුමරානනි...

ඔබ හා මා හමුවේනම්
ජීවිතය ඔබ හට දෙන්නම්
ඔබගේ සුසුමන් තුල ගිලිහී
ඔබගේ තුරුලේ මිය යන්නම්

මතකේ හස‍රැල්...//


සුභම සුභ දවසක් අදත් පැල්පතට ගොඩවැදුනු හැමෝටම...ඉතින් දින කීපයකට පස්සේ අදත් අලුත් ලිපියක් අරගෙන තමයි පැල්පතට ආවේ.ගොඩක් අය චෝදනා කරල තිබුන පරණ ගීත පමණක් ද පැල්පතෙන් ඉදිරිපත් කරන්නෙ කියල, නමුත් පැල්පත කියන්නෙ ගීත පමණක් ඉදිරිපත් කරන ‍බ්ලොග් අඩවියක්ම නෙමෙයි. පැල්පතට ලැබෙන ලිපි හා ගීත බොහොමයක් අද දවස වෙනකොට අපිට සමාජයේ අහන්න දකින්න තියෙන දේවල් වලින් සැදුම් ලත් ලිපි වෙනවා. ඉතින් කිසිම විටක එකම පරාසයකට පමණක් සීමා වෙලා ඇති ලිපි කියල කියන්න අමාරුයි. ඉතින් ඒ අදහස තවත් ‍‍වර්ධනය වෙන්න අද එකතු කරන ගීතය ඉවහල් වෙයි කියල මම හිතනවා. ගීතය තමයි "මතකේ හසරැල්" ගීතය ගායනා කරනු ලබන්නේ වර්තමාන තාරුණ්‍යයේ ඉතාම ජනප්‍රිය ගායකයෙක්, නර්ථන ශිල්පියෙක් හා සිනමා නළුවෙක් වන දුෂ්‍යන්ත් වීරමන් හා සුපිරි කටහඩකට හිමිකම් කියන උමාරා සිංහවංශ යන දෙපල විසිනුයි. මේ දෙප‍ලගේ විශිෂ්ඨ ගායනය හා ගීතයට මුසුකර ඇති සංගීතය නිසා අද වන විට ගීතය බොහෝසෙයින් ජනප්‍රියව තිබෙනවා.කෙතරම් ගීතය නැවුම් වුවත් නිතරම පැල්පතට ලැබෙන ගීත බොහොමයක මුසු විරහව මේ ගීය තුලත් එසැනින්ම තිබෙන බව නම් මුලින්ම කියන්න ඕනෙ. ගීතය ආරම්භයේ සිටම පෙම්වතාට සිතට දැනෙන දුක ව‍වාගත නොහැකි බව හා පෙම්වතිය මෙතරම් කුරිරු වූයේ මන්ද කියා අසයි. තම ජීවිතයේ සොදුරුම අවදියේ ඉතා දැඩිව ආදරය කල පෙම්වතිය අන්සතු වී ඇති බව හා එම මතකයන් සිතට කෙතරම් වද දෙනවාද යන්න ගීතයේ පදපේලි ගලපා ඇති අයුරින් රස විදින අපට
හැඟීයයි. නමුත් පෙම්වතා නිතර කියූ සේ පෙම්වතිය කුරිරු වී පලා ගියා නොව පෙම්වතියද එය සිදුකලේ සිත‍කින්‍ නොවන බව හා ඒ පිළිබඳ සමාව ගන්නා අයුරු පෙම්වතියගේ ගීපද පේලි තුලින් ඉදිරිපත්කරයි...
"සිතකින් නොව ඔබ දමා ගියේ
ඔබ ගැන සිහිවෙයි හැම මොහො‍‍තේ
දුක පමණයි මට උරුම වුනේ
සමාවෙන්න කුමරානනි..."
පැල්පතට එකතු වූ ප්‍රථම යුග ගීතය, හා ප්‍රථම නව පරපුරේ ගීතය මෙය වන නිසා ගීතය පිළිබඳ අදහස් විශාල ප්‍රමාණයක් ඇතැයි විශ්වාස කරනවා. සුපුරුදු පරිදි අඩුපාඩු ඇත්නම් හා ගීතය පිළිබඳ තවත් අදහස් ඇතිනම් ඉදිරිපත් කරන්න කියල ඉල්ලා සිටිනවා...


::::ගීතය මෙතනින් බාගන්න::::

::ගීතයේ වීඩියෝව මෙතනින් බලන්න::

"කවුරුවත් නැහැ කවුරුවත් නැහැ"



කවුරුවත් නැහැ - කවුරුවත් නැහැ
එගොඩට යන්නට - එ‍ගොඩට යන්නට...
ඉරගල වැටිලා - ඉවුර දෙපැත්තේ
අඳුර ගලනවා - පාරුව ඇතුලට
ලංතෑරුම කෝ ඔහෙ තිබුනාවේ...
කවුරුවත් නැ කවුරුවත් නැ...

දවසින් දවසම පාලම හැදුනා
පාලම් මොලෙන් හෙන හඩ ඇසුනා
කිරන කැලෑවේ කුරුළු කොබෙයියන්
ගම හැරදා යන්න ගිහින්...

කවුරුවත් නැ කවුරුවත් නැ....//


දෑතේ අතැගිලි හබලට ගෙවුනා
ගෙනියන්නට බැරි මහ බර තිබුනා
මෙතුවක් නොම ගිය බර අද දවසේ
මට හිනැහීගෙන යනවා රහසේ

කවුරුවත් නැ කවුරුවත් නැ....//

පොඩ්ඩක් විවේක තිබුනු වෙලාවක ‍ඔන්න ආවා පැල්පතට අලුත් ගීතයක් අරගෙන, පැල්පතට අලුත් වුනත් ගීතය නම් ටිකක් පරණයි. ගීත‍යේ සුවිශේෂී බව වෙනත් ගීත වල මෙන්ම අර්ථය හා සංගීතය තුල මනාව ගැබ් වෙලා තියෙනවා. මෙතෙක් අපි කතා කරපු ගීත වල බහුතරයක් ආදරය හා විරහව වැනි මාතෘකා ඔස්සේ තිබුනත් මේ ගීය ගායනා කරනු ලබන්නේ තම ජීවනෝපාය ලෙස පාරුවක් මගින් මිනිසුන් ගඟින් එතෙර කරන තොටියෙකුගේ දුක් ගැනවිල්ලක් පිළිබඳවයි. නමුත් මේ ගීතයේ අර්ථය පිළිබද තොටියාගේ දෙසින් බැලූ කල නිවැරදි වුවත් සිදු වී ඇත්තේ මෙතෙක් ගඟ හරහා පාරුවෙන් ගමන් කල මිනිසුන් හට ගඟින් එතෙර වීමට පාලමක් ගමට ලැබී ඇති බවයි. ගමට පාලමක් ලැබෙන විට සෑම‍ දෙනාම ඒ පිළිබඳ සතුටු වුවත් දුප්පත් ‍මේ තොටියාට නම් එය වාවාගත නොහැකි දුකක් වී ඇත. එයට හේතුව ලෙස ගීතය තුල දිනෙන් දින පාලම ඉදි වූ ආකාරයත්, අදවන විට කිසිදු කෙනෙකු තමාගේ පාරුවෙන් ගමන් කිරීමට නොයෙන බවත් සඳහන් කරන අතර ඔහු අතීතයේ පාරුවෙන් මිනිසුන් ගෙන ගිය ආකාරය සහ ඒ ගෙනයාමේදී ඇතිවන
අපහසුව පිළිබදවත් දැක්වීමට මනා පද පේලිකීපයකින් ගීතය අලංකාර කර ඇත. එනම්,
"දෑතේ අතැගිලි හබලට ගෙවුනා
ගෙනියන්නට බැරි මහ බර තිබුනා"
නමුත් ඒ කාලය වන විට ගමට අත්‍යවශය ව තිබූ මේ මිනිසා පිළිබඳ අද වන විට කිසිදු තැකීමක් නොකරන බව දැක්වීමට අවසාන පද කීපයෙන් මෙසේ සදහන් කරනවා
"මෙතුවක් නොමගිය බර අද දවසේ
මට හිනැහීගෙන යනවා රහසේ"
සමාජයේ දියණු වීම බහුතරයකට නිවැ‍රදි වුවත් ඒ දියණුව පිළිබඳ සාදාරනව දුක්වන යම් පිරිසක් ගැන ගායනා කරන එකම ගීතය මා දන්නා තරමින් මෙය වේ. ගීතය අමරසිරි පීරිස් මහත්මයගේ "ස්නේහයේ නගරයයි" ගීත ඇල්බමයේ
ඇතුලත් වන ගීතයක් වන අතර අමරසිරි පීරිස් මහත්මයාගේ මා ප්‍රියකරන ගීත අතර තවත් එක් සුවිශේෂී ගීතයක් ලෙසද මෙය සදහන් කිරීමට පුළුවන්. ඉතින් වෙනදා වගේම පැල්පතෙන් ගීත‍ය රසවිදල ඔබට දැනෙනඅදහස ඉදිරිපත් කරන ලෙස ඉල්ලා සිටිනවා...


::::ගීතය මෙතනින් බාගන්න::::

"හන්තානට පායන සඳ"


හන්තානට පායන සඳ
ලස්සනයිද කියන්න...
මා නොදකින ඒ පුර හඳ
ඔබට හැකිය දකින්න...//

අඳුරු ලලා වහිනා කල
සරසවි බිම තෙමෙන්න...//
කුඩේ යටින් ඔබ යන කල
එපා තනිය දැනෙන්න...

ලතා මඩුළු අත වනාවි
එපා අහක බලන්න...//
මා ගැන මතකය ගුලිකර
මහවැලියට දමන්න...
හන්තානට පායන සඳ...//

සුභම සුභ දවසක් කියල ප්‍රාර්ථනා කරනවා පැල්පතට ආපු හැමොටම ඉතින් වැඩ ගොඩාක් වැඩි දවස් ටිකක් තමයි ගෙවිල ගියේ. ඒ හින්දා පැල්පතට ගොඩ වදින එකත් ටිකක් අඩු වුනා. ඉතින් පැල්පතේ අය දැනටමත් දන්නව ඇති මමත් කන්ද උඩරට කෙනෙක් කියල. ඉතින් ගමේ වැඩිය ඉන්නෙ නැති නිසා ඒ පැත්ත මතක් වෙන ගීතයක් ඇහුනොත් ඒක හිතට ගොඩාක් දැනෙනවා. ඉතින් අද අරගෙන ආපු ගීතය පේරාදෙණිය විශ්ව විද්‍යාලයට සම්බන්ධ ඉතාම අලංකාර ගීතයක් වෙනවා. මේ ගීතයේ සංගීත‍ය නිර්මාණය කරල තියෙන්නේ ගුවන් විදුලි සංස්ථාවේ වාදන කණ්ඩායම මෙහෙය වන්නා වන නාලක අංජන කුමාර මහතා විසිනුයි. ගීතය ගායනය කරන්නේ නම් අපි කව්රුත් හොදින් දන්නා අමරසිරි පීරිස් නම් අතිවිශිෂ්ඨ කලාකරුවා විසින්. ගීතය ඇතුලත් වන්නේ "නිල් කැට වැස්ස" ගීත ඇල්බමයේයි. මේ ගීත ඇල්බමය කිසිදු වෙළඳ ආයතනයක විකිණීමට නැති බවයි මගේ මතය. ගීත ඇල්බමයේ නිශ්පාදන කටයුතු සිදුකලේ මා දන්නා තරමින් දිවයිනේ විශිෂ්ඨ භෞතික විද්‍යාදේශකයෙකු වන මාගේ උසස් පෙල ගුරු කීර්ති ධර්මසිරි මහතායි. එතුමා නිසා ගීත‍ය දැනට වසර කීපයකට පෙර ඉතා රසවත් ලෙස මා හට ඇසීමට හැකීවූ බව කියන්නේ මහත් ආඩම්බරයෙන්...

ඉතින් ගීතය ගැන පැවසීමේදී ආරම්බයේදීම හන්තාන කදු පන්තියට පායන සඳ ගැනත් පසුව මහවැලි නදිය ගැනත් මතක් කර දීමේදී ගීතය විශ්ව විද්‍යාලයට සම්බන්ධ බව රසවිදින අපට හැගීයයි. විශ්ව විද්‍යාලය තුල ඇතිවන ආදරනීය හමුවීම්, හදවතට දැනෙන වෙන්වීම් ගැන කියැවූ ගීත අප කොතෙකුත් අසා ඇතත් මේ ගීතය ඒ අතරින් සුවිශේෂයි කියල කියන්න පුළුවන්. තමා සමග කලක් පෙමින් වෙලී සිටි ප්‍රේමවන්තිය අද තමා තනිකර වෙන අයෙකු වෙත ගොස් ඇතිබවත්, තමන් ආදරය කල අවදියේ ඇතිවූ මිහිරි මතකයන් සිතින් ඉවත් කර නව දිවිය සතුටින් ගෙවන ලෙස පෙම්වතා දුක්බර ලෙස පවසයි. මේ අදහස ගීතයේ ඉදිරිපත් කරන අයුරු කෙතරම් අපූරුද යන්න හැගෙන්නේ ගීතය අවසාන පද කීපය අප දෙසවනට ඇසෙන මොහොතේයි. ගීතය බොහෝ දෙනෙක් අසා ඇතැයි සිතනවා. එහෙත් මෙතෙක් ගීතය ලග නොමැති අයට පැල්පතෙන් ගීතය ලබා ගන්න කියල ඉල්ලා සිටිනවා. ඒ වගේම හැමදාම කියනවා වගේ අදහසක් දක්වලා ගීතයේ ඇති අඩුපාඩු පෙන්නලා දෙන්න කියල ආදරයෙන් මතක් කරනවා.


ගීතය පිළිබඳ ඉතා සාර්ථක අදහසක් තීර්ථ යාත්‍රිකයා විසින් පැල්පතට ‍එකතු කර ඇති අතර ඒ අදහසින් පසු මෙතෙක් මා තුල ගීතය ගැන තිබූ අදහසට යම් වෙනසකමක් ඇති වී ඇත. ඉතින් තීර්ථ යාත්‍රිකයා හට ස්තූති කරන අතර මගේ අදහස ද වෙනස් නොකර එලෙසම තබා ඇත. ඔබටත් ඔහුගේ අදහසින් ගීතය රසවිදින ලෙස ආරාධනා කරනවා...



::::ගීතය‍ මෙතනින් බාගන්න::::

"මවකගෙ උණුසුම නොලබා"


මවකගෙ උණුසුම නොලබා
සැපට නිදන පුතේ...
ඔබටත් මට මෙන් තනිකම
දැනෙනවාද පුතේ...
ඔබෙන් සිඟිති පුතේ
මගෙ පාළුව ‍මැකේ...

හිතේ තියෙන පාළු ගතිය
මගහරින්න පුතේ...
සුර කුමරුන් සමගින් ඔබ
හි‍නැහෙනවද පුතේ...
අප දෙන්නා අඳුරු ලොවක
තනි කර දා පුතේ...
නුඹෙ අම්මා දිවිය ලෝකෙ
ගියා පුංචි පුතේ...

මා හට දී ‍ඔයා - ඈ සු‍රලොව ගියා...
සුර විමනක වැදී - මගෙ රන්කද නිදී...

තවමත් කිරි සුවඳ දැනේ
ඔබේ සිඟිති කටේ...
ඔබ නැති නම් මම දැනටත්
මැරී ඇතැයි සිතේ...
පුතු‍ගෙ උපත ම‍වගෙ විපත
එක දිනයෙම උනේ...
කොහොම ද මම සිහිකරන්නෙ
පුතුගෙ උපන් දිනේ...

මා හට දී ‍ඔයා - ඈ සු‍රලොව ගියා...//
ලොකු උනාම අම්මා ගැන
අහන්නෙපා පුතේ...
එතකොට මගේ දෙනෙත්
වලට කඳුළු පිරෙයි පුතේ...
සුර විමනක වැදී මගෙ රන් කද නිදී...//


සුභම සුභ දවසක් කියල ප්‍රාර්ථනා කරනාවා පැල්පතේ හැමෝටම දින කීපයක ඉදල දාන්න හිතාගෙන හිටපු ලිපියක් ඔන්න අද තමයි එකතු කරන්න හදන්නේ. ඇත්තටම ගීතය ගැන කියන්න කලින් ‍මෙම ගීතයේ නිර්මාණය වීම ගැන වචනයක් කියන්න ඕනෙ. ගීතය රචනා කරල තියෙන්නෙ ප්‍රවීණ ගීත රචක ප්‍රේම්නාත් ජයතිලක විසින්, ඒ වගේම ගීතය ගායනා කරන්නෙ කේ.කේ.සේන නම් කලාකරුවා විසින් ගායකයාගේ විශේෂත්වය වන්නේ මේ ඔහු ගායනා කරන එකම ගීතය වීමයි. ගීතය දුටු සැනින් අරුත ගැන යම් වැටහීමක් හිතට ඇති වුවත් ගීතයේ ඇති අලංකාරය හා අර්ථ රසය ගැන නම් කිව යුතුමයි. බිලිදෙකු මෙලොව එලි‍ය දකින මොහොතේ තමන්ගේ මව ‍මිය ගොස් ඇති අවස්ථාවක පියාට දැනෙන දුක සහ තම මව ‍නොදුටු මේ නොදරුවා සැපට නිදන අවස්ථාව ගැන ගීතයෙන් ඉදිරිපත් කරයි. මෙවන් වියෝවිමක් දැනට අප සමාජයේ ඇසීමට නොලැබෙන නමුත් එකල ‍මෙය වාවාගත නොහැකි සමාජයම කම්පා වන සිද්දියක් බව ගීතය ඇසීමේ දී අපට හැඟීයයි. මෙහිදී දරුවා සමග තනි වූ පියා අනාගතයේදී දරුවා අම්මා ගැන විමසීමේ දී හා තම පුතුගේ උපන් දිනය සැමරීමේ දී එ‍හි සතුට බුක්ති විදින අකාරය කෙසේද යන්න සිතමින් පසු තැවෙන අයුරු ගීතය තුලින් මතු වී
පෙනේ.කුඩා කල ගීතය අප උපරිමෙන්ම රස වින්දත් මේ ‍වන විට ගීතය ඇසෙන්නේ නැති තරම්. කෙසේ වුවත් ගීතය අප අතරින් ද වියෝ වීමට ඉඩ නොදී ඉදිරියටත් ගීතය අප හදවත් තුල තබා ගන්නට පැල්පතෙන් පුංචි ආරාධනාවක් කරනවා...


පැරණි, අමතක වී ගිය මේ අගනා ගීතය පැල්පතට එක් කරන්න නිතර මතක් කර දුන් කට්ටා සහෝදරයව ආදරෙන් මතක් කරන අතර ගීතයේ විස්‍තර මෙන්ම ඉපැරණි බව හදුන්වා දුන් තරිඳු සහෝදරයටත් පැල්පතෙන් හදපිරි ස්තූතිය පුද කරනවා. ඒ වගේම දැනට අසනීප තත්වයෙන් පසුවන කට්ටා සහෝදරයාගේ මෑණියන්ට ඉක්මන් සුවය ප්‍රාර්ථනා කරන අතර එළබෙන දකුණු ආසියානු මලල ක්‍රීඩා උළෙලට ශ්‍රී ලංකාව නියෝජනය කරමින් සහභාගීවන තරිඳු සහෝදරයටත් නිසැක ජයග්‍රහනය පැල්පතෙන් මෙලෙස ප්‍රාර්ථනා කරනවා.



::::ගීතය මෙතනින් බාගන්න::::

දඩුබස්නාමානය(තේමා ගීතය)


ගීතයක අරුතට වඩා යමක් එක්කරන්න අද මම හිතුවා. දැන් ලබා දෙන ලිපිය ගැන කියන්න නම් බොහෝ දේ තිබුණත් මේ ගැන කථා කිරීමට අවශ්‍ය නැ කියලයි මගේ අදහස, මොකද අද වන විට මේ ගීතය හා මේ නාට්‍ය ගැන අසා නැති කෙනෙක් නොමැති තරම්...ඉතින් තවත් රසවත් නොකර කියන්නම් ඒ ජයන්ත චන්ද්‍රසිරි නම් අති විශිෂ්ඨ අධ්‍යකෂකවරයාගේ දඩුබස්නාමානය නම් ටෙලි නාට්‍යයයේ තේමා ගීතයයි. ටෙලි නාටකය පිළිබඳ සදහන් කිරීමේ දී ප්‍රධාන චරිත රගපෑ

ශ්‍රියන්ත මෙන්ඩිස්
බුද්ධදාස විතානාරච්චි
කමල් අද්දරආරච්චි
සේනක විජේසිංහ
විශිෂ්ඨ නළුවන් සේම, දමිතා අබේරත්න වැනි විශීෂ්ඨ නිලියන් ගැන මතක් කල යුතුම වෙනවා...ඉතින් තවත් මේ නාට්‍යයේ ජනප්‍රියත්වය වත් එය දිනූ සම්මාන පිළිබඳවත් මා කථා කිරීමට බලාපොරොත්තු වෙන්නෙ නැ.නමුත් මෙහි තේමා ගීතය ගැන ඔබ නොදන්නවා ඇතැයි සැලකෙන දෙයක් සදහන් කරන්නම් මෙම ගීතයේ සංගීත අධ්‍යකෂනය සිදුකර ඇත්තේ අප රට තුල මෙතෙක් බිහිවූ අති දකෂ සංගීත අධ්‍යකෂක වන පේමසිරි කේමදාස මහතායි. ඒ වගේම මෙහි තනුව ගැන යමක් කියනවනම් මේ නිර්මාණය සඳහා ජයන්ත චන්ද්‍රසිරි මහතා මහනුවර ශ්‍රී දළාදා මාළිගයේ රහසිගතව ගායනා කරන කොල්මුර නම් කවි ආස්‍රයෙන් නිවවූ බව සදහන් වෙනවා. මේ තනු නිර්මාණයෙන් පසු මොහුට මේ කවි ඇසීමට ආරාධනා ලැබුනු බවද සඳහන් වෙනවා...කෙසෙ‍් නමුත් අප නොදන්නා මෙවන් නිර්මාණශීලී යමක් ගැබ්ව නැතිනම් මෙතරම් මෙම නිර්මාණය ජනප්‍රිය වීමට ඉඩ නොතිබෙන්නට ඇත.
ඉතින් සුපුරුදු පරිදි තවත් අදහස් හා මේ පිළිබඳ තවත් තොරතුරු ඇත්නම් පැල්පතට රැගෙන එන්න කියල මම ආරාධනා කරනවා...


::::ගීතය මෙතනින් බාගන්න::::

"සැදෑ කළුවර"


සැදෑ කළුවර කුර ගගා විත්
ඔබේ පැල්පත මගේ දසුනින්
ඈත් වූ සඳ මගෙ සරා සඳ
තනි වෙලා මා තනිවෙලා

වළාකුලකුත් නොමැති අහසේ
මළානික වූ මගේ සිතුවිලි
ගල් ගැසී ඇත - පාළු වී ඇත
අඳුර පමණක් රජ වෙලා...

සැදෑ කළුවර...//

ඔබේ ලෝකය මගේ ලෝකය
අතර ඇත්තේ රැයක් පමණයි
ගව් ගනන් දුර - ජී‍විතේ බර
මගේ හිස මත පරවෙලා...

සැදෑ කළුවර...//


වෙසක් නිවාඩුවෙන් පස්සේ ඔන්න අද තමයි පැල්පත පැත්තේ ආවේ. විරහව සිතට දැනුනු එයින් තනිකමක් දැනුනු කෙනෙකුට දැනෙන හැඟිමක් ගැන කියවෙන මේ ගීතය ඉතාම අපූරුවට ගායනා කරන්නේ විශාරද නන්දා මාලනී මහත්මිය විසිනුයි. මා විසිනුත් ගීතය නිතරම අසා නැතත් හිතට දැනෙන අමුතු රසයක් ඇති ගීතයක් ලෙස හදුන්වන්න පුළුවන්...නමුත් ඉතාම නිවැරදි තේරුමක් මින් ගන්නට කොතෙකුත් උත්සහ කලත් මා හට එය සාර්ථක කරගන්නට නම් හැකි වුනේ නෑ. නමුත් දැනෙන සරලම ආකරයෙන් මෙය ඉදිරිපත් කරන්නට බලාපොරොත්තු වෙනවා, ඒත් මේ ලිපිය කියවන ඔබට අඩුපාඩු සහ වෙනත් අදහස් දැනෙන්න පුළුවන් එය ඉදිරිපත් කර අදහස් බෙදාගන්නා ලෙස ආදරයෙන් ඉල්ලා සිටිනවා.
ගීතයේ මුල් පද හ‍තරේදීම හා අන්තරා කොටසට පිවිසෙත්ම ගීතයේ අර්ථය පිළිබඳ පෙර කී විරහව දැනුනත් ඉන් විරහව විදිනවාට වඩා ඔහුට ඇය හෝ ඇයට ඔහු හිමි වී සිටි ආකාරය සහ මෙහි පවසන
"ඔබේ ලෝකය මගේ ලෝකය
අතර ඇත්තේ රැයක් පමණයි..."
යන පද පේලි හා අවසානය මට නම් තවමත් ප්‍රශ්නාර්ථයක්ම පමණයි....


::::ගීතය මෙතනින් බාගන්න::::

"ඔබ මා හමුවේනම්"


ඔබ මා හමුවේ නම්
එකම කතාවක් එකම වතාවක්
යලිත් කියන්නට
ඔබ මා හමුවේ නම්...//

අතීතයට පිය මනිනු බැ‍රී
ඒ පෙම් දැහැනේ නටඹුන් ද නැතී...//
පිනි කදුලක් සේ...
මැකී ගිහින් ‍- සිතේ ඉතිරි වූ
එකම කතාවක් - යලිත් කියන්නට
ඔබ මා හමුවේනම්...

සිනා පිරුනු නෙතු දකිනු බැරි
මා ඔබ හමුවුනු මාවත වෙන් වී...//
මහ පවුරක් සේ...
නැගී ඇවිත් - මුවේ පිපේ නම්
එකම සිනාවක් - යලිත් දකින්නට
ඔබ මා හමුවේ නම්...

ඔබ මා හමුවේ නම්...//


"විරහව" තමන්ගේ ආදරය අවසන්ව කෙතරම් කලක් ගතවී තිබුනත් තවමත් සිතින් ඒ විරහව විදින ඒ ගැන පසුතැවෙන පෙම්වතෙක් ගැන පවසන මේ ගීතය මා වඩා ප්‍රියකරන ජගත් වික්‍රමසිංහ මහත්මයාගේ තවත් හදවතට දැනෙන ගීතයක් වෙනවා. ගීතය ගැන අත්දැකිම් මා හට නැතත් අප විසින් අමතක කරන ලද ප්‍රථම ප්‍රේමයක් අපි හැමෝගෙම සිත්තුල තවමත් අනවසරයෙන් රජකරනවා කියලයි මගේ මතය...

කෙසේ නමුත් සිත් පුරා ආදරය කල පෙම්වතිය අද තමා ලග නොමැති බව සත්සුදක් සේ දන්නා පෙම්වතා ඔහුගේ අහිංසක බලාපොරොත්තුව මෙසේ හැඟුම්බරව ඉදිරිපත් කරයි...අමතක කල නොහැකි ඒ අතීතයට නැවත පියමන් කල නොහැකි බවත්, ඇගේ සිනා පිරිනු නෙතු නැවත දැකගත නොහැකි බව දන්නා පෙම්වතා "එකම කතාවක් - එකම සිනාවක්" යලිත් බලාපොරොත්තු වන්නේ ඉතාම දුක්බර ලෙසයි...ආදරය හා විරහව සමව විදි පැල්පතේ සහෝදර සහෝදරියන්ට මේ ගීතය පිළිබඳ සිතට දැනෙන දේ ඉදිරිපත් කරන්න මගෙන් ආරාධනා...!


විදින්න නොව දැනෙන්න හා ඉන් මිදෙන්න, මේ ගීය මගේම සහෝදර "සයිL3න්ටි[කිL3ර්]"ට.........!!!


::::ගීතය මෙතනින් බාගන්න::::

"මහ වරුසාවට"


මහ වරුසාවට පසුව නැගෙන සඳ
වෙනදාටත් වැඩියෙන් එළියයි
නෝක්කාඩුවට පසුව ඔබේ වත
ඒ එළියට වැඩියෙන් එළියයි...//

ඇලදොල පාමුල ගොළුවුන ගීයකි
අප හදවත් බැඳි සොදුරු සෙනේ...
අද නොදකින ඔබ හෙට දකිනා තුරු
මඟ බලමින් මා සිත ලතැවේ...

මහ වරුසාවට...//

ඔබ මට හමුවුන මල්බර මාවත
වෙනදාටත් වැඩියෙන් සුවදයි...
විටකදි නැගුනත් සැක බිය ශෝකය
පිවිතුරු සෙනෙහස අද උතුරයි...

මහ වරුසාවට...//


එතරම් ජනප්‍රිය‍ නොවුනත් ගීත අතලොස්සක් පමණක් ගායනා කරල තියෙන සෝමතිලක ජයමහ මහත්මයාගේ "මහවරුසාවට" නම් ගීතය ඒ ගී අතරින් විශේෂ වෙන්න පෞද්ගලිකව මට හේතු නැතිවාම නෙමෙයි...ආදරය කරන පෙම්වතුන් බොහෝදෙනෙක් මේ අත්දැකීමට මුහුණ දීලා ඇති කියල අවිවාදයෙන් තොරව මම කියනවා...කෙතරම් ආදරය, සෙනෙහස පෙම්වතියට ලැබුනත් පෙම්වතා සමඟ නෝක්කාඩුවීමේ අඩුවක් නම් පෙම්වතියකගෙන් කිසිදා බලාපොරොත්තු නොවිය යුතු දෙයක් කියලයි මගේ මතය...ඉතින් ගීතයේ මුල් පද හතරේදීම අපට හැඟෙන්නේ තමා ආදරය කරන යුවතිය තමා සමග අමනාප වී ඇති අවස්ථාවක, ඇගේ රුව ගැන වර්ණනා කර ඒ අමනාපයෙන් මිදෙන්න දරණ වෑයමක් ගැනයි. සැබැවින්ම එය බොරු ආටෝපයක් පමණක් නොව ඇය සැබවින්ම තමන්ට වටින බව එතැන් සිට මුළු ගීතය පුරාම හදුන්වාදෙයි...
පෙම්වතියට සියල්ල අමතක වීමට, තමන්ගේ ප්‍රේමකතාවේ අතීතයට ඇයව ගෙන යන පෙම්වතා එහි රසමුසු තැන් ගැන සහ මෙතෙක් කල් ආද‍රයෙන් වෙලී සිටි ආකාරය සිතුවමක් ලෙස පෙම්වතියට මතක් කර දෙයි...ඒ ඔහුන් මුනගැසුනු ඇල දොල ගැන සහ ඇය එන තුරු මඟ බලා සිටි ආකාරය මනාව මතක් කර දෙයි. එසේම එකල බැදුනු ප්‍රේමය අද වන විට තවත් වැඩි වී ඇති බව පෙන්වීමට ගීතය අපූරු පද කිහිපයක් අලංකාර කර ඇත එනම්,
"ඔබ මට හමුවුන මල්බර මාවත
වෙනදාටත් වැඩියෙන් සුවදයි.."
‍කෙසේ වුවත් ගෙවුනු කාලයේ සෑම පෙම්වතුන් යුවලකටම සේම මොවුන්ටද විටින් විට ඇතිවූ සැක-බිය දුක ගැනත් නොහැගෙන ලෙස දක්වා තිබෙනවා. කෙසේ වෙතත් සියළු දේ මැද ඔහුන්ගේ "පිවිතුරු සෙනෙහස අද උතුරයි..."

ඉතින් මේ ලිපියේ විශේෂ දෙයක් කියන්න තියෙනවා. කලින් වගේම ගායනය පමණක් හරි හැටි දන්නා හින්දා ඒ පිළිබඳ ලි‍පියේ සදහන් කලා. ගීතය ගැන තොරතුරු දන්නවානම් සදහන් කරන ලෙස ඉල්ලා සිටිනවා. ලිපියේ විශේෂ ස්තූතිය "කට්ටා" සහෝදරයට පිරිනැමෙන්න ඕනෙ කියල මම හිතනවා. මතකයෙන් ටිකක් ඈතට ගිය මේ ගීතය නැවත මතක් කර දීම පිළිබඳ ඔහුට විශේෂයෙන් ස්තූති වන්ත වෙනවා.



::::ගීතය මෙතනින් බාගන්න::::

"මුතු කුඩ ඉහලන"



මුතු කුඩ ඉහලන මල් වරුසාවේ
උඩ ඉගිලෙන විට වැහිලීනී
එබී බලා රිය කවුළු දොරින්
යට ගිය දවසේ දෑස පියා ඉගිලී

අඳුරු ලලා සෙන්කඩගල වැස්සේ
දිය දහරා පාටයි දේදුන්නේ
තෙමී තෙමී ආදර මධු වැස්සේ
ගිය දෙදෙනා අද යනවා දෙමන්සලේ...

රිය ඇතුලේ උණුසුම ඔබට දිදී
නහවයි මා රිය සක මඩ වතුරේ
නෑ හිත රිදුනේ - අදත් එදා සිහිවී
අපේ සබදකම් නෑ රියසක දන්නේ...

මුතු කුඩ ඉහලන...//



නිතර අහන්න නොලැබෙන එහෙත් ඇසූ අයගේ මුවින් නොගිලිහෙන මේ ගීතය රෝහණ වීරසිංහ මහතමයාගේ තවත් අතිවිශිෂ්ඨ නිර්මාණයක්. මේ ගීතය රසවීදීමේදී මැවෙන සිතුවමට කාටත් වඩා සෙන්කඩගල කන්ද උඩරට අයට විශේෂ‍ වෙනවා කියලයි මගේ හැඟීම. හොදම උදාහරණය මේ ලිපිය ලියන මමත් මහනුවර ම වීමයි. ඉතින් ගීතය ගැන විචාර, අර්තකතන බොහොමයක් මේ වෙනකොට බිහිවෙලා තිබුනත් පෞද්ගලික මගේ අදහස නම් ටිකක් වෙනස්, ගීතය ගැන ලියන්න කලින් මා සමඟ මේ ගීතය ගැන අදහස් කියූ සෑම දෙනාටම ස්තූති වන්ත වෙනවා. ‍ඒ බොහෝ දෙනෙක් අදටත් පැල්පතට ගොඩ වැදිල යන අය...
පෞද්ගලිකව මෙවන් අත්දැකීමක් නැතත් ගීතයේ මැවෙන රූපය සිතේ මැවෙන ආකාරය ඉතාම හැඟුම්බරයි. වළාකුලින් බරව මහ වැස්සක ලකුණු පෙන්වන මොහොතක ඔහු දකින එක් දසුනක් නිසා ඔහුගේ සිත දුක්මුසු අතීතයකට පිය මනින බවක් ගීතයෙන් අඟවනවා. ඒ ඔහු ආදරය කල යුවතිය තමා අසලින් ‍රථයක නැගී ගමන් කරන දසුනයි. ‍ගීතයේ අන්තරා කොටසට පිවිසෙත්ම මොවුන‍් පෙම්වතුන්සේ ගෙවුනු අතීතය මැනවින් පැහැදිලි කරන අතර ඒ සමගම ඔහුන් දෙදෙනා අද වනවිට ප්‍රේමය අවසන්ව මාවත් දෙකකට පිවිස ඇති බව පවසයි. ගීතයේ අවසානයේ දී එනම්

"රිය ඇතුලේ උණුසුම ඔබට දිදී
නහවයි මා රිය සක මඩ වතුරේ..."

යන පද පේලි වලදී මා හට හැඟීයන්නේ පෙම්වතාට දුකක් දැනුන මුත්, පෙම්වතියට එවන් පසුතැවිල්ලක් නොහැගෙන ලෙස ඉන්නා බවයි. එය රිය ඇතුලේ උණුසුම විදින පෙම්වතිය හා එම රිය පාරේ ගමන් කරන විට මහමඟ ඇති මඩ වතුරෙන් නැහැවීයන මෙම පුද්ගලාගෙනුත් අර්ථවත් කරයි. නමුත් පෙම්වතා සිදුවූ සියල්ල අමතක කීරීමට තමාගේ සිත නොරිදුනු බව අවසන් පද පේලි දෙකෙන් කීමට උත්සහ කරයි...නමුත් එය හුදු මුලාවක්ම පමණක් බව ඔහුට මෙන්ම අපට ද හැඟීයයි...




::::ගීතය මෙතනින් බාගන්න::::


::::ගීතයේ කෝඩ් මෙතනින් බාගන්න::::

"සඳ කැන් වැටිලා"



සඳ කැන් වැටිලා අදුරේ එතිලා
ඝණදුරු රෑ තනිකම නෑ
සොයා එන්න ඝණදුර තරු නිවලා
මගේ එළිය අද ඔබ පමණි...

ජීවිතයම සතු එකම සුවේ
හීසර පහරක වෙලෙනු පෙනේ...//
මේ ලොව මා සතු ඈ සතු ඒ නෙතු
අසල්වාසියෙකු සොයනු දැනේ....

සඳ කැන් වැටිලා...

‍මා නැත අන්සතු සිත් බිඳලා
දෑතම බැදගෙන හිදිමි බලා...//
මේ ලොව යම් දවසක අපි වෙන්වෙමු
රහස් අහස් තලයට පවරා...

සඳ කැන් වැටිලා...


හොදයි පැල්පතට එකතු වුන අළුත් "කාමරයෙන්" මෙන්න පළවෙනි ලිපිය...
මුල්ම ගීතය විදියට මම තෝරගත්තේ විශාරද වික්ටර් රත්නායක මහත්මයගේ "සඳ කැන් වැටිලා" කියන ගීතය. ඇත්තටම ගීතය තෝරගන්න හේතු වුනේ මේ ගීතයේ තියෙන අර්ථයට හා සංගීතයටයි. ගීතය ගැන සරල අදහසක් මට දැනෙන විදියට ඔයාලට දෙන්න හිතුවා ඒත් අඩුපාඩු හා තවත් මෙයට එකතු වෙන්න ඕනෙ දේවල් තියෙනවනම් එකතු කරන්න කියල ඔයාලා හැමෝටම ආරාධනා කරනවා.
"සඳ කැන් වැටිලා අදුරේ එතිලා - ඝණදුරු රෑ තනිකම නෑ" ඉතාම සරලව කිව්වොත් මෙයින් අපට මැවෙන රූපය නම් විශිෂ්ඨයි. රාත්‍රියේ සදේ එලිය වැටී ඒ එලිය අදුරත් එක්ක මුසුවෙලා හිතට තනිකමක් දැනෙන වෙලාවක, ඒ ඝණදුරු රාත්‍රිය කිසිම තනිකමක් නැති බව අගවනවා. එයිනුත් පසුව ඒ තනිකම නැතිවෙන්න, ඒ ඝණදුර නැතිවෙන්න නම් ඔහුගේ ජීවිතයට එළිය වුනු කෙනෙකුට ආරාධනාවක් කරනවා. නමුත් ඒ ආරාධනාව පිළිගනීද...?
ගීතයේ අන්තරා කොටසට පිවිසෙන කොට ගීතය රසවිදින අපට එහි අර්ථය මනාව පැහැදිලි වෙනවා...‍එය පෞද්ගලිකව මම මේ ගීතයේ ඉතාම ප්‍රිය කරන කොටසක් ද වෙනවා. තමන් ජීවිතයේ හදවතින්ම ආදරය කරන කෙනාගේ සිදුවන යම් වෙනස් වීමක් ගැන ඉතාම හැඟුම්බරව මෙයින් කියා සිටිනවා...එනම් මේ ලොව මාහට හිමි එහෙත් ඈට අයිති ඈගේ නෙත් වෙනත් කෙනෙකු, අසල්වාසියෙකු සොයනු ඇතැයි පැවසෙනවා...මෙම අදහස ගීතයට එක් කර ඇති අයුරු නම් විශිෂ්ඨයි...

"මේ ලොව මා සතු ඈ සතු ඒ නෙතු
අසල්වාසියෙකු සොයනු දැනේ..."

මෙවන් අත්දෑකිමක් නැතත් ඉතාම හොදින් සංගීතයත් සමග මේ ගීය රසවිදින්න පුළුවන් කියලයි ‍මගේ අදහස. ‍ඉතාම කෙටියෙන් සරලව මගේ ඇති අවම දැනුමෙන් මේ ගීතය ගැන කෙටි අදහසක් තමයි මේ විදියට ඔයාලට ලබා දුන්නේ. ඉතින් විචාරයක් ඉදිරිපත් කිරීම විවෘත හින්දා හැමෝටම ආරාධනා කරනවා අදහසක් දක්වන්න කියලා...

2010-11-26
ගීතය ඉදිරිපත් කර හරියටම 6 මසකට පසු නැවත නිවැරදිව සංශෝදනය කිරීමට හැකිවීම සම්බන්ධයෙන් ගොඩක් සතුටු වෙනවා. ඉතින් මා ගීතය ඉදිරිපත් කර පසුව එහි සංගීතය හා පද රචනාව සිදුකල ශිල්පීන් පිළිබඳ සහෘද්ධ ඔබගෙන් ඉල්ලා සිටියා. ඉතින් වියත් ඔබගේ අදහස් වලින් ලිපිය සැකසීමේ දී මාහට සහය දැක්වූ ආගන්තුකයා ඇතුළු මාගේ සහෝදර අනෙක් ‍බ්ලොග් කරුවන්නට හදවතින්ම ස්තූතිවන්ත වෙනවා...
පද රචනය : ප්‍රේමකීර්ති ද අල්විස්
සංගීතය : වික්ටර් රත්නායක

::::ගීතය මෙතනින් බාගන්න::::
::::ගීතයේ කෝඩ් මෙතනින් බාගන්න::::

Veer Zaara(2004)400mb.&.All.video.Songs


ඔන්න ඉතින් අයෙත් දවස් කිහිපයකට පස්සේ වැඩ පොඩ්ඩක් අඩු වෙලාවක් බලලා පැල්පතේ අයට විශේෂ යමක් අරගෙන ආවා. ඒ තමයි ඉංග්‍රීසි උපසිරසත් සමග Veer-Zaara(2004) චිත්‍රපටයේ 400mb ටොරන්ට් එක සහ චිත්‍රපටයට ඇතුලත් සියලුම ගීත වල වීඩි‍යෝ දර්ශන. ඉතින් ඔයාලා හිතනවා ඇති මේ වගේ පරණ චිත්‍රපටයක් ඇතුලත් කලේ ඇයි කියල. ඒකට ප්‍රධාන හේතුව වුනේ මේ වනවිටත් ඉතා සාර්ථකව‍ තිරගත වෙන My Name Is Khan චිත්‍රපටය. Rizvan Khan නමැති මුස්ලිම් ජාතික තරුණයෙකුට ඇමෙරිකාවේ දී සිදුවන අසාධාරනයක් ගැන My Name is Khan වලින් පිළිඹිබු වෙනවා. ඒ වගේම හින්දු ජාතික Veer Pratap Singh නම් තරුණයාට පකිස්තානයේ දී සිදුවන අසා‍ධාරණයක් පිළිබදව Veer-Zaara චිත්‍රපටයෙන් කියැවෙනවා...ඉතින් චිත්‍රපට දෙකම මම සැසදීමට උත්සහ කරන්නෙ නැ.නමුත් මම සදහන් කල චරිත දෙකම චිත්‍රපටයේ නිරූප‍නය කරන්නේ සුපිරි බොලිවුඩ් නළු ෂාරුක් ඛාන් විසින්. 2004 වර්ෂයේ Veer-Zaara චිත්‍රපටයේ ප්‍රධාන චරිතය නිරූපනය කල ෂාරුක් ඛාන් හට IIFA Awards, Star Screen Awards, Zee Cine Awards, Bollywood Movie Awards සහ Global Indian Film Awards යන සම්මාන උළෙල වලදී හොදම නළුවාට හිමි සම්මානය පිරිනැමුනා. චිත්‍රපටයට හිමි වූ සියලු සම්මාන ගැන කතා කරනවනම් ප්‍රධාන වශයෙන්, ෆිල්ම් ෆෙයාර් සම්මාන උළෙලේ සම්මාන 15කට මෙම චිත්‍රපටය නිර්දේශ වූ අතර එයින් Best Dialogue, Best Story සහ Best Lyricist යන සම්මාන 3 දිනාගනු ලැබුනා. මීට අමතරව ඉන්දියාවේ අනෙකුත්, ප්‍රසිද්ධ සම්මාන උළෙල 7 කදී සම්මාන 30 අධික ප්‍රමාණයක් දිනා ගැනීමට සමත් වුනා. මෙයිනුත් හොදම නළුවා, හොදම නිලිය, හොදම සහය නිලිය, හොදම සහය නළුවා සහ හොදම අධ්‍යකෂක යන සම්මාන ප්‍රධාන වෙනවා. ඉතින් මෙතරම් සාර්ථක චිත්‍රපටයක් සදහා දායක වූ පිරිස ගැන පොඩි සටහනත් දාන්නම් කියලා හිතුවා.
සුපුරුදු පරිදි සුපිරි නිර්මාණයක සුපිරි අධ්‍යක්ෂකගේ හිමිකාරීත්වය Yash Chopra හට හිමිවී තිබෙන අතර නිශ්පාදන දායකත්වය Aditya Chopra හා Yash Chopra විසින් දරා තිබෙනවා. කථාව ලියා ඇත්තේ ද Aditya Chopra විසිනි. ඒ ‍‍වගේම සංස්කරණය Ritesh Soni විසින් ද සිනෙමාරූපණය Anil Mehta විසින් ද සංගීතය Madan Mohan හා Sanjeev Kohli විසින් ද මැනවින් ඉටුකර දී ‍තිබෙනවා. ඉතින් මිනිත්තු 191 පුරා දිවයන මෙම චිත්‍රපටය IMDB rank 7.3/10 ම ලබාගෙන තියෙනවා. තවද නිර්මාණය සදහා සම්පූර්ණ වියදම $400,000 පමණ වන අතර මෙම චිත්‍රපටයේ ආදායම $12,938,532 පමණ වන බව සදහන් වෙනවා. ඒ ‍වගේම චිත්‍රපටයේ බෙදාහැරීම් කටයුතු Yash Raj Films ආයතනය විසින් සිදුකර ඇති අතර 2004 ‍නොවැම්බර් මාසයේ 12වන දින ඉන්දියාව ඇතුළු රටවල් කිහිපයකම ප්‍රදර්ශනය ආරම්භ කරල තියෙනවා. චිත්‍රපටයේ ඇතුලත් නළු‍ නිලියන් පිළිවෙලින්,
Shahrukh Khan - Veer Pratap Singh ලෙසත්,
Preity Zinta - Zaara Haayat Khanලෙසත්,
Rani Mukerji - Saamiya Siddiqui නම් නිතීඥවරිය ලෙසත්,
Manoj Bajpai - Raza Shirazi ලෙසටත් ප්‍රධාන චරිත සදහා දායකත්වය සපයා තිබෙනවා.

ඉතාම රසමුසු දුක්බර වගේම හැඟුම්බර ආදර කථාවක් ‍සමග අලංකාර ගීත කිහිපයකින් සමන්විත වී ඇති මෙම චිත්‍රපටය තවමත් නැරඹීමට නොහැකි වූ අයට හා නැවතත් නැරඹීමට කැමති අය ඇති නම් පැල්පතෙන් ඒ අවස්ථාව ලබාගන්නා ලෙස ඉල්ලා සිටිනවා....


My Name Is Khan(කතා බහ)

සුභම සුභ දවසක් කියල ප්‍රාර්ථනා  කරනවා පැල්පතට ආපු හැමෝටම...ඉතින් ඔන්න අලුත්ම චිත්‍රපටයක කතා බහක් අරගෙන තමයි මම අද පැල්පතට අවේ.ඉතින් මම මේ කියන්න යන්නේ දැන් මේ දවස් වල ගොඩක් කථාවෙන, පෙබරවාරි 12 වෙනිදා ඉදලා බොලිවුඩයට සමගාමීව ලොව පුරා ප්‍රදර්ශනය ආරම්භ වු කරන් ‍ජෝහර්ගේ MY NAME IS KHAN චිත්‍රපටය ගැනයි. ඉතින් මම වාගේම අපි කවුරුත් ආදරය කරන ‍බොලිවුඩයේ රජු ලෙස විරුදාවලිය ලබා ඇති සුපිරි නළු ෂාරුක් ඛාන් සමගින් කාලෙකට පස්සේ සුරූපි නිළි කාජල් දේව්ගන්, මෙහි ප්‍රධාන චරිත සඳහා දායකත්වය ලබාදී තිබෙනවා. මෙම චිත්‍රපටයේ ත්‍රස්තවාදය හා ජාතිභේදය පිළිඹිබු වෙලා තියෙනවා කියලා ගොඩක් ආන්දෝලනයකට ලක්වෙලා තියෙන‍වා. නමුත්‍ මෙහි සුන්දර ආදර කථාවක් ගැබ්වෙලා ‍තියෙනවා කියල තමයි සදහන්වෙන්නෙ.
ඉතින් මෙහි කථා සාරාංශය ගැන කියනවනම් රිස්වාන් ඛාන් නමැති මානසික රෝගීතත්වයකින් පෙලෙන මුස්ලිම් දරුවෙකු තම මව සමග මුම්බායි නගරයේ බොරිවාලි නම් ගමේ ජීවත් වෙනවා. රිස්වාන් තරුණ වියට එළබෙත්ම ඔහුගේ එකම සොහොයුරා හා ඔහුගේ බිරිද සමග ඇමෙරිකාවේ සැන් ෆැරැන්සිස්කෝ නගරය වෙත පිටත්ව යනවා.ඉතින් මෙහිදී රිස්වාන්ට සුරූපි මන්දිරා නම් තරුණියක් මුණ ගැසෙනවා.කාළය ගතවෙත්ම මාපියන්ගේ ආශිර්වාද මැද මොවුන් විවාහ දිවියට එළබෙනවා.මේ කාල‍ය වෙනකොට එනම් සැප් 11 තමයි ඇමෙරිකාවට ත‍්‍රස්තප්‍රහාරය එල්ලවෙන්නෙ. මේ සිදුවීමෙන් පස්සේ රිස්වාන් යුවලට බොහෝ කරදර වලට මුහුණ‍ දීමට සිදුවෙනවා. ඒ හේතුව නිසාම රිස්වාන් යුවලට වෙන්වීමට ද සි‍දුවන අතර සිය බිරිද සමග නැවත එකතු වීමට රිස්වාන්ට කරදර බාධක වලින් පිරුන දුෂ්කර ගමනකට එක් වීමට සිද්දවෙනවා. රිස්වාන්ට සිදුවන කරදර මොනවාද? බිරිද සමග නැවත එකතුවීමට ලැබෙයිද? මේ ප්‍රශ්න වලට උත්තර ගන්න නම් අනි‍වර්යෙන් මේ චිත්‍රපටය නරඔන්නම වෙනවා.ඉතින් කරන් ජෝහ‍ර්ගේ පස්වන සිනමා නිර්මානය වන මෙය ධර්ම ප්‍රඩක්ෂන් හා රෙඩ් චිලි එන්ටර්ටේන්මන්ට් ආයතනය විසින් නිර්ෂ්පාදය කරල තියෙනවා. ඒ වගේම ෆොක්ස් ස්ටාර් එන්ටර්ටේන්මන්ට් ආයතනය විසින් මෙහි ප්‍රචාරන කටයුතු හා බෙදාහරීම් කරල තියනවා.මම පොරොන්දු වෙනවා මෙම චිත්‍රපටයේ හොද පිටපතක් ලැබුනු ගමන් පැල්‍පතේ අයට ‍ලබා දෙනවා කියල...සුභ දවසක්..!

කථාව - කරන් ජෝහර් හා ෂිබානි බතීජා
තිර රචනය - ෂිබානි බතීජා
සංගීතය - ශන්කර් / ඊශාන් / ලෝයි 


AVATAR [2009]


ඔන්න‍ එහෙනම් මෙච්චර කල් හිච්චිහාමිනේ ලිපි ලියුවේ මෙන්න එහෙනම් මගෙනුත් අලුත්ම ලිපියක් සුපුරුදු විදියටම බලලා ප්‍රතිචාරයක් දක්වන්න කියලා ඉල්ලා සිටිනවා.ඉතින් මං ඔයාලට අරගෙන ආවේ මේ දවස්වල අති සාර්ථක ලෙස තිරගත වෙන AVATAR චිත්‍රපටයේ හොදම ටොරන්ට් කොපිය. ඉතින් චිත්‍රපටය ගැන ටිකක් කියන්නම් කියලත් හිතුවා.මේ චිත්‍රපටයේ අන්තර්ගත වෙලා තියෙන්නෙ 2154 දි සිද්දවෙන අපූරු සිදුවීමක්...
චිත්‍රපටයේ රචනය හා අධ්‍යක්ෂනය යන දෙකම කරලා තියෙන්නෙ James Cameron විසින්. ඒ වගේම Sam Worthington, Zoe Saldana, Sigourney Weaver, Michelle Rodriguez Saha හා Stephen Lang යන අයත් සහ‍ය වෙලා තිය‍නවා.මෙහි ප්‍රධාන චරිතය වන Jake Sullyගේ චරිතය නිරූපනය කරනු ලබන්නේ Sam Worthington විසින් සහ Zoe Saldana විසින් Neytiriගේ චරිතය නිරූපනය කරනු ලබනවා. ඉතින් චිත්‍රපටය හදන්න පටන්ගෙන තියෙන්නෙ 1994 වර්ශයේයි. මේ අවුරුද්දේ Cameron විසින් ප්‍රථම වරට පිටු 80 පිටපතක් ලියලා තියෙනවා.1994 පටන් ගත්ත මේ චිත්‍රපටය ඇත්තටම මංගල දර්ශනය පවත්වන්න හිතන් ඉදලා තියෙන්නෙ 1999 වර්ශයේ දි නමුත් Cameronට මේ කාලය වන විට තමන්ට අවශ්‍ය මට්ටමේ සාර්ථක නිර්මාණයක් කර ගන්න බැරි වෙලා තියෙනවා. ඒකට ප්‍රධාන හේතුවක් වෙලා තියෙන්නෙ මේ කාලය වෙනකොට AVATAR නිශ්පාදනය සාර්ථක කිරීමට තරම් තාක්ෂනයක් නොතිබීම.
AVATAR චිත්‍රපටයේ නිශ්පාදන කටයුතු සදහා මුලින්ම ඇස්තමේන්තු කරපු මුළු මුදල ඩොලර් මිලියන 237යි. එපමණ මුදලක් ඇස්තමේන්තු කලත් නිර්මාණය අතිසාර්ථකව අවසන් වෙනකොට ‍ඩොලර් මිලියන 310කට ආසන්න මුදලක් වැය වූ බව තමයි ආරංචි වෙන්නේ. මීට අමතරව මෙහි පූර්ව ප්‍රචාරන කටයුතු සදහා ඩොලර් මිලියන 150ක මුදලක් වැයකරල තියෙනවා කියලයි පැල්පතේ අපිට දැනගන්න ලැබුනේ. ඉතින් මෙය මුළු ලෝකය පුරාම ප්‍රදර්ශනය කරන්න පටන් අරගෙන තියෙන්නෙ 2009 දෙසැම්බර් 16 වැනිදා. මෙහි පළමු දර්ශනවාර කිහිපයේදීම Box Office වාර්ථා කිහිපයක්ම බිද දමන්න සමත්වෙලා තියෙනවා.
මෙම නිර්මාණය සඳහා නිර්දේශ වූ සම්මාන ගැන කියනවනම් මෙවර එනම්, 9වෙනි ඔස්කාර් සම්මාන උළෙලේ හොදම රූප රචනය හා හොදම අධ්‍යක්ෂනය යන සම්මාන දෙක සදහාම AVATAR යෝජනා වෙලා තියෙනවා කියලයි දැනගන්න ලැබෙන්නේ.
ඉතින් මේ අනර්ඝ නිර්මාණය මෙසේ තිරගත වෙද්දී මෙහි අධ්‍යක්ෂකවරයා වන James Cameron විසින් මෙහි දෙවන චිත්‍රපටයේ නිශ්පාදන කටයුතු ද ආරම්භ කරඇති බව අපට දැනගන්න ලැබුනා...

ඉතින් කියන්න ‍ඔනේ මෙම ලිපිය සැකසීමේ දී මගේ සහෝදර හිච්චිහාමි‍ගේ උපකාරය මට නොමදව ලැබුනා ඒ වගේම අමතක කරන්න හොද නැහැ අපිට ගොඩක් උදව් කරන සයිL3න්ටි[කිL3ර්] සහොදරයාවත්...,අන්තිමටත් ඔය‍ගොල්ලන් හැමෝ‍ටම කියන්නේ චිත්‍රපටය නරඹලා ප්‍රතිචාරයක් දක්වන්න කියලා...


Rab Ne Bana Di Jodi All mkv Music Videos

ඔන්න එහෙනම් මේ වතාවේ පැල්‍පතෙන් ලැබෙන්නෙ බොලිවුඩ් සිනමාවේ 2008 වර්ශයේ අතිශය ජනප්‍රිය ‍වුන Rab Ne Bana Di Jodi චිත්‍රපටියේ සියලුම ගීතවල Music Videos.ඉතින් රස විදලා ප්‍රතිචාරයක් දෙන්න කියල ඉල්ලා සිටිනවා.
ඉතින් මේත් එක්කම මේ චිත්‍රපටය ගැනත් පොඩි විස්තරයක් දෙන්නම් කියලා හිතුවා. මේ චිත්‍රපටයේ අධ්‍යක්ෂනය හා රචනය කරල තියෙන්නෙ ආධිත්‍ය චොප්රා නම් අති දක්ෂ අධ්‍යක්ෂකවරයා විසින්,ඒ වගේම මෙහි නිශ්පාදන කටයුතු Yash Raj Films ආයතනය විසින් කරල තියෙනවා, චිත්‍රපටයේ කථාව ගොඩක් අමුතු වෙනස්ම නිර්මාණයක් කියල කියන්න පුළුවන් ඒ හේතුව හින්දම සහ සුපිරි නළු ෂාරුක් ඛාන්ගේ රංඟනය නිසාම, මෙම චිත්‍රපටිය මෙතරම් ජනප්‍රිය වෙන්න ඇති කියලයි මගේ මතය.ඒ වගේම අමතක කරන්න හොද නැහැ මෙහි Taaniගේ චරිතය නිරූපනය කරන අනුෂ්කා ෂර්මාගේ රංඟනය ගැන, දමිල සිනමාවේ අනුෂ්කාව නිතර දකින්න ලැබුනත් හින්දි සිනමාවට එහෙමත් නැතිනම් බොලිවුඩ් සිනමාවේදී ඇගේ රංඟනය දැකගන්න ලැබුනු ප්‍රථම අවස්ථාව තමයි මේ චිත්‍රපටය. ඉතින් ගොඩක්ම මෙහි කැපීපෙනෙන්නේ අනුෂ්කාගේ හා ෂාරුක් ඛාන්ගේ නර්ථනය.2008 දෙසැම්බර් 12 වැනිදා ඉන්දියාව ඇතුලු රටවල් කිහිපයකම තිරගත වීම ආරම්භ වුනු මේ චිත්‍රපටය IMDB rank 10න් 6.6ක් ම ලබාගෙන අතිසාර්ථක ලෙස තිරගත වුනා.ඉතින් මිනිත්තු 167 පුරා දිවයන මේ චිත්‍රපටය තරුණ වයසේ බොලිවුඩයට ආදරය කරන සෑම දෙනෙකුම නැරඹිය යුතුම චිත්‍රපටයක් කියලයි පැල්පතේ අපි දෙන්නා‍ගේ අදහස...
ඉතින් ඒ ‍වගේම ඔයාලාත් කැමති හින්දි චිත්‍රපටයක වී‍ඩියෝ අවශ්‍යනම් අපේ පැල්පත‍ට ගොඩවැදිලා දැනුම් දීමක් කරන්න කියල මං ඉල්ලා සිටිනවා...
[{[(::: Posted by හිච්චිහාමි :::)]}]

-=®Track List®=-

01 Dance Pe Chance
02 Dancing Jodi
03 Haule Haule
04 Haule Haule Music
05 Phir Milenge Chalte Chalte
06 Rnbdj1 Music
07 Rnbdj2 Music
08 Tujh Mein Rab Dikhta Hai
09 Tujh Mein Rab Dikhta Hai 2
10 Tujh Mein Rab Dikhta Hai 3
11 Tujh Mein Rab Dikhta Hai 4 (Slow Female)
12 Tujh Mein Rab Dikhta Hai 5 (Last)
13 Tujh Mein Rab Dikhta Hai 5 (Last2)

Centigradz 2nd Album Rusiri


ඔන්න එහෙනම් හා හා පුරා කියලා හිච්චිහාමි වන මම විසින් ඉදිරිපත් කරන පලවෙනි ලිපිය.ඉතින් කියවලා බලලා හොදයි නම් බා‍රගෙන ප්‍රතිචාරයක් ඉදිරිපත් කරන්න කියලා ඉල්ලා සිටිනවා.
මගේ පළවෙනි ලිපියෙන් ලබා දෙන්නෙ මේ දවස්වල ජනප්‍රිය සංගිත කණ්ඩායමක අලුත්ම ගීත එකතුවක්.ඒ තමයි CENTIGRADZ සංගීත කණ්ඩායමේ රූසිරි කියන ගීත එකතුව.‍ගොඩක් අය දැනටමත් මේක රසවිදලා ඇති කියල මම හිතනවා.ඉතින් අහන්න බැරි වුන අයට මෙන්න අපේ පැල්තෙන් ඒකට අවස්ථාව තියෙනවා.
ඉතින් ගීත‍ එකතුව සහ සංගීත කණ්ඩායම ගැනත් පොඩ්ඩක් කියනවනම්,
CENTIGRADZ සංගීත කණ්ඩායම විසින් එලිදක්වපු දෙවන ගීත‍ එකතුව තමයි මේ රූසිරි කියන්නේ.මොවුන්ගේ පළවෙනි ගීත ඇල්බමය එනම් උරුමය නිකුත් කරලා, අවුරුදු 4කට පස්සේ තමයි මෙම ගීත‍ එකතුව එළී දක්වල තියෙන්නෙ. මෙහි ගීත 18 අඩංගු වෙලා තියෙනවා. සිංහල ගීත‍ වගේම මෙහි එක් ද්‍රවිඩ ගීතයකුත් ඇතුලත් වෙලා තියෙනවා. මේ ද්‍රවිඩ ගීතය පැහැසර නුඹෙ ආදරේ කියන සිංහල ගීතයේ තනුවටම අනුව තමයි ඉදිරිපත් කරල තියෙන්නෙ.ඒ වගේම මෙම ගීත‍යේ පද රචනය කරල තියෙන්නේ ජූඩ් ජයප්‍රකාශ් විසිනුයි.
ඉතින් මෙහි තියෙන අනෙක් විශේෂත්වය වෙන්නෙ මෙහි නිශ්පාදන කටයුතු කරල තියෙන්නෙ මැක්රො එන්ටර්ටේන්මන්ට් හා සිනමන් රෙකෝඩ් කියන අලුත්ම අයතන දෙක මගිනුයි.
ඉතින් ගීත‍ එකතුව නම් අති සාර්ථකයි...අහලම බලන්න..



ඉතින් හැමෝටම ඔන්න ආයුබෝවන් කිව්වා.බොහෝම ස්තූතියි අපේ මේ පුංචි පැල්පතට හා හා පුරා කියලා ගොඩ වැදුනට. ඉතින් ඉදිරියටත්, යන එන ගමන් අපේ පැල්පතටත් ‍ගොඩ‍වැදිලා යන්න කියලා පුංචි ආරාධනාවක් කරනවා.
ආ...සමාවෙන්න අපි අපි කියල කිව්වට මගේ සහෝදරයා අදුන්නලා දෙන්න බැරි වුනානේ..එයා තමයි අප්පුහාමි.
මේ පැල්පතේ මීට පස්සේ ඔබ තමුන්නාසේලාට මුණ ගැහෙන්නෙ අපි දෙන්න තමයි...
හොදයි එහෙනම් ඔන්න අද ඉදලා අපි ලග තියෙන වටිනා කියන දේවල් ඔබ සියලු දෙනාට ඉදිරිපත් කරන්නයි සූදානම. ඉතින් එවා බලලා ප්‍රතිචාරයක් ඉදිරිපත් කරන්න කියලා ඔබ තමුන්නාන්සේලාගෙන් ඉල්ලා සිටිනවා...

ආයුබෝවන් මම හිච්චිහාමි......!

ඉතින් හැමෝටම ඔන්න ආයුබෝවන් කිව්වා.බොහෝම ස්තූතියි අපේ මේ පුංචි පැල්පතට හා හා පුරා කියලා ඔබ තමුන්නාන්සේලා ගොඩ වැදුනට. ඉතින් අද පටන් මේ යන එන ගමන් අපේ පැල්පතටත් ‍ගොඩ‍වැදිලා යන්න කියලා ඉල්ලා සිටිනවා.ආ සමාවෙන්න අපි අපි කියල කිව්වට මගේ සහෝදරයා අදුන්නලා දෙන්න බැරි වුනානේ..එයා තමයි අප්පුහාමි. මේ පැල්පතේ මීට පස්සේ ඔබ තමුන්නාසේලාට මුණ ගැහෙන්නෙ අපි දෙන්න තමයි...